Jemqorlyq úshin birinshi basshylardyń jeke jaýapkershiligi qalaı engiziledi
Agenttik tóraǵasynyń orynbasary Oljas Bektenovtyń aıtýynsha, birinshi basshynyń qol astyndaǵy qyzmetker jemqorlyq úshin ustalsa, sol basshynyń ózi jaýapqa tartylady. Alaıda aldymen arnaıy tekseris uıymdastyrylady.
«Bárimiz jaqsy bilemiz, ótken jyly Memleket basshysy Joldaýda naqty tapsyrma berdi. Qazir zań jobasy Parlamentte birinshi oqylymnan ótti. Endi, ekinshi oqylym bar. Atalǵan qujatta jemqorlyq úshin birinshi basshylardyń jeke jaýapkershiligi jazylǵan. Sybaılas jemqorlyqtyń aldyn alý sharalary jasalmasa, birinshi basshy jaýapqa tartylatyn bolady. Árıne, aldymen tekseris bolady. Ol basshy profılaktıkalyq sharalardy ótkizdi me? Joq pa? Jemqorlyqtyń aldyn alýǵa múmkindik boldy ma? Osynyń bári jan-jaqty zerdelenedi», - dedi O.Bektenov QazAqparat tilshisine bergen suhbatynda.
Agenttik tóraǵasynyń orynbasary QR Indýstrııa jáne ınfraqurylymdyq damý mınıstrliginde basshylyqtyń aýysýy buǵan deıingi josparlarǵa keri áserin tıgizbeıtinin de jetkizdi. Atalǵan mınıstrliktiń alqa májilisinde QR Premer-Mınıstriniń orynbasary Jeńis Qasymbek (ol kezde QR Indýstrııa jáne ınfraqurylymdyq damý mınıstri - avt.) jemqorlyq úshin birinshi basshynyń jeke jaýapkershiligin engizetinin málimdegen bolatyn.
«Ótkende QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń tóraǵasy Alık Shpekbaevpen kezdeskende biz bylaı kelistik. Eger aýmaqta bir basshy ustalsa, onda osy salaǵa jaýapty komıtet tóraǵasy nemese onyń orynbasary otstavkaǵa ketýi kerek. Qazir biz agenttikpen birlesip jumys istep jatyrmyz. Bálkim, ortaq bir qujatty qabyldaımyz. Alaıda budan bylaı mende osyndaı ustanym bolady. Máselen, bir salanyń basshysy paramen ustalsa, komıtet tóraǵasynyń orynbasary jumystan ketýi tıis. Al jergilikti jerde ınspektor qolǵa tússe, birden departament basshysy jumystan ketedi. Búgin men ýáde beremin, ınspektor paramen ustalsa, departament dırektory jumystan qýylady. Al departament basshysy ustalsa, komıtette ózgerister bolady. Ortalyq apparatta da solaı bolady. Onyń bári maǵan da qatysty», - dedi J.Qasymbek.
QR Memlekettik qyzmet isteri jáne sybaılas jemqorlyqqa qarsy is-qımyl agenttigi tóraǵasynyń orynbasary Oljas Bektenovtyń sózine qaraǵanda, mınıstrliktiń buǵan deıingi basshylyǵy kótergen bastamalar jalǵasa beredi.
«Ol jumysqa mınıstrdiń aýysqany áser etpeıdi. Oǵan qosa, birlesken sharalarǵa Roman Sklıardyń ózi jaýapty boldy. Sondyqtan osy saladaǵy jumys jalǵasa beredi. Qazir is-sharalar josparyn daıarlap jatyrmyz. Ony bekitkennen keıin naqty jumysqa kirisemiz», - dep atap kórsetti O.Bektenov.