Jemqorlyq týraly habarlaǵan bes adam 650 myń teńge syıaqy aldy – Aqmola oblysy

KÓKShETAÝ. QazAqparat - Aqmola oblysynda aǵymdaǵy jyldyń 8 aıynda 37 adam qylmystyq jaýapkershilikke tartyldy. Bul týraly onlaın brıfıngte óńirdiń sybaılas jemqorlyqqa qarsy qyzmetiniń basshysy Arman Rahımov málim etti, dep habarlaıdy QazAqparat tilshisi.

«Jaýapkershilikke tartylǵan 37 adamnyń teń jartysy basshy bolyp tabylady, onyń ishinde 5 oblystyq mańyzy bar, 10 qalalyq jáne aýdandyq, 1 aýyldyq okrýg ákimi», - dedi Arman Rahımov.

Onyń aıtýynsha, jyl basynan beri Departamentpen 43 qylmystyq is tirkelgen, onyń 67 paıyzy aýyr jáne asa aýyr qylmystarǵa jatady. Sotqa 30 is jiberildi.

Sondaı-aq, aımaqtyq Antıkor júıeli sybaılas jemqorlyqtyń 5 faktisin anyqtady, onda 12 qylmys anyqtalyp, 13 adam tartyldy.

Memlekettik organdardyń laýazymdy tulǵalary tarapynan ShOB qyzmetine zańsyz aralasýdyń 7 faktisi, sondaı-aq laýazymdy tulǵalardyń kóleńkeli ekonomıka sýbektilerine qamqorlyǵynyń 2 faktisi anyqtaldy. Memlekettik baǵdarlamalardy iske asyrýdy súıemeldeý aıasynda 12 qylmys tirkeldi.

Aǵymdaǵy jyldyń 8 aıyndaǵy jumys qorytyndysy boıynsha memleketke ótelgen zalal somasy 900 mıllıonnan astam teńgeni qurady.

«Departamenttiń jedel jumysyn uıymdastyrý kezinde, eń aldymen, júrgizilip jatqan ázirlemelerdiń sapasyna, júıeli sybaılas jemqorlyq, shaǵyn jáne orta bızneske zańsyz aralasý jáne kóleńkeli ekonomıkany qorǵaý faktilerin áshkereleýge basa nazar aýdarylǵanyn atap ótken jón», - dedi spıker.

Sondaı-aq, Arman Rahımov qylmystyq isterdi tergeý nátıjeleri boıynsha sybaılas jemqorlyqtyń sebepteri men jaǵdaılaryn joıý úshin memlekettik organdar men uıymdarǵa QR Qylmystyq protsessýaldyq kodekstiń 200-babynyń negizinde usynymdar engiziletinin habarlady.

Aǵymdaǵy jyldyń esepti kezeńinde oblystyń Antıkory 41 usynys engizdi. Olardy qaraý boıynsha ótkizilgen 20 kezdesýge 400-ge jýyq memlekettik qyzmetshiler men túrli uıymdardyń qyzmetkerleri qatysty.

Qaralǵan usynystardyń nátıjeleri boıynsha 26 laýazymdy tulǵa, onyń ishinde 10 basshy tártiptik jaýapkershilikke tartyldy. 4 laýazymdy tulǵa jumystan shyǵaryldy men atqaratyn qyzmetinen bosatyldy. Jartysynan kóbi sógis pen eskertý aldy, sondaı-aq, 7 adamǵa qyzmetke tolyq sáıkes emestigi týraly eskertildi.

«Sybaılas jemqorlyqqa qarsy qyzmet óz jumysynda sybaılas jemqorlyq quqyq buzýshylyqtardy jasaǵany úshin jazanyń bultartpastyǵy qaǵıdatyn basshylyqqa alady. Bizdiń azamattarymyzdy osyndaı quqyq buzýshylyqtarǵa tap bolǵan kezde 1424 Sall-ortalyǵyna dereý habarlaýǵa shaqyramyn», - dep túıindedi ol.

Aıta ketý kerek, osy jyldyń basynan beri óńirde sybaılas jemqorlyq faktileri týraly habarlaǵan 5 adam 650 myń teńgeden astam somaǵa yntalandyrylǵan.