Jemqorlyq týraly habarlaǵan adam 250 myń teńge syıaqy alýy múmkin

KÓKShETAÝ. QazAqparat – Aqmola oblysy boıynsha jemqorlyqqa qarsy is-qımyl departamenti oblystyq aýyl sharýashylyǵy basqarmasynyń ujymymen kezdesý ótkizdi, dep habarlaıdy QazAqparat tilshisi.

Kezdesýde memlekettik qyzmet kórsetýdegi jemqorlyq qaýipti aldyn alý, qyzmetkerlerdiń ádeptiligin arttyrý máseleleri talqylandy.

Aqmola oblysy boıynsha jemqorlyqqa qarsy is-qımyl departamenti baspasóz qyzmetiniń málimetinshe, basqosýda jemqorlyq qylmysty aldyn alý baǵytynda atqarylyp jatqan keshendi sharalar sóz boldy. Atalmysh departamenttiń bas mamany Medet Turybaev atap ótkendeı, jemqorlyq quqyqbuzýshylyq týraly málimet bergen adamnyń qupııalylyǵy saqtalatyndyǵy kepildendirilgen.

«Jemqorlyq quqyqbuzýshylyq týraly málimet bergen adam bir rettik aqshalaı syıaqyǵa ıe bola alady. Sonymen qatar, jańa QR QK sáıkes para bergeni týraly óz erkimen habarlaǵan tulǵa qylmystyq jaýapkershilikten bosatylady. Eger málimet rastalyp, sotqa jazaǵa tarýt týraly sheshim shyǵarsa, onda jemqorlyq quqyqbuzshylyq týraly habarlaǵan adamǵa 250 myń teńgege deıin (30-100 AEK) somada syıaqy beriledi» - dep atap ótti Medet Turybaev.

Onyń sózinshe, departament tarapynan jemqorlyqqa qarsy is-qımyl jáne ony anyqtap, aldyn alý, eskertý boıynsha júıeli jumystar júrgizilýde. Sonymen birge, jemqorlyq quqyqbuzýshylyq úshin jazadan qutyla almaıtyn prıntsıpin tolyqqandy júzege asyrýdy qamtamasyz etý mindeti tur.

Kezdesý sońynda qatysýshylarǵa jemqorlyq quqyqbuzýshylyq úshin jaýapkershilik jóninde beınerolık usynyldy.