Jemqorlyq týraly habar bergen adamnyń aqparaty shynaıy bolýy kerek - agenttik
Paraqorlyqty habarlaýǵa shaqyrý – báleqorlyqty týyndatpaı ma? Bul suraqqa Sybaılas jemqorlyqqa qarsy is-qımyl agenttiginiń seriktestik departamentiniń dırektory Rasýl Medetov jaýap berdi, dep habarlaıdy QazAqparat tilshisi.
«Qazaq «aýrýyn jasyrǵan óledi» deıdi. Sondyqtan árıne belgili bir jerde paraqorlyq faktisi tirkeletin bolsa ol jaıly habarlaý – bizdiń mindetimiz, azamat retinde paryzymyz. Biraq bul rette bir máselege nazar aýdartqym keledi. Ózim de óńirlerde jumys istedim. Azamattardyń keıbiri anaý jerde mynadaı, mynaý jerde anadaı paraqorlyq bolyp jatyr dep negizsiz ári dáleldenbegen aqparat berip jatady. «Qymbat kóligi bar, demek para alady» eken degen osyndaı alypqashpa sózder shyndyqqa janaspaýy da múmkin. Sondyqtan kelip túsken aqparat mindetti túrde shyn bolýy kerek», - dedi Rasýl Medetov agenttiktiń Facebook paraqshasyndaǵy suhbatta sóılegen sózinde.
Onyń aıtýynsha, Sybaılas jemqorlyqqa qarsy is-qımyl agenttiginiń qyzmetkerleri belgili bir adamnyń dálelsiz sózine bola sol adamdy ustaı almaıdy.
«Sebebi kez kelgen adamnyń Konstıtýtsııamen bekitilgen quqyǵy bar. Zańdy túrde bári dáleldenýi kerek», - dedi ol.