Jemqorlyq týraly aqparat bergen aqtóbelikterge 2 mln teńge syıaqy berildi
Aqtóbe oblystyq sybaılas jemqorlyqqa qarsy qyzmet departamentiniń basshysy Baýyrjan Balǵabekov ótken jyldy qorytyndylady. Óńirde 53 qylmystyq is tirkelgen. Onyń 33-i aýyr qylmys sanatyna jatady. 28 qylmys qarjyny jymqyrý, 5-ýi laýazymdyq ókilettiligin teris paıdalaný jáne 18-i paraqorlyq. Departamenttiń habarlaýynsha, Aqtóbe qalasy ákiminiń orynbasary, Aqtóbe qalasynyń TKSh bóliminiń basshysy, «Aqtóbe qalasyn tıimdi damytý ortalyǵy» KMM basshysy isti bolyp, aýdandyq deńgeıdegi birqatar jergilikti atqarýshy organdardyń basshylary tizimde bar. Memlekettik baǵdarlamalardy júzege asyrý kezinde kóptegen qylmys tirkelgen. Olardyń altaýy «Nátıjeli jumyspen qamtýdy jáne jappaı kásipkerlikti damytý», beseýi «Óńirlerdi damytý», tórteýi «Nurly jol», úsheýi «Bilim men ǵylymdy damytý» jáne ekeýi «Jumyspen qamtýdyń jol kartasy» baǵdarlamaryna tıesili. Qylmystyq ister boıynsha keltirilgen zalal kólemi 240,8 mln teńgeni qurap otyr, onyń 201 mln teńgesi óteldi. Sonymen birge jemqorlyq týraly habarlaǵan 11 adamǵa 2 mıllıon teńge syıaqy berildi.
«Jedel-tergeý baǵytynda júrgizilip jatqan jumystarymyzǵa qaramastan, jemqorlyqtyń tıimdi aldyn alý men aýqymdy aǵartý isi bizdiń qyzmettegi basym baǵyt bolyp tabylady», - dep atap ótti Baýyrjan Balǵabekov.
Aıta keteıik, departament bıýdjet qarjysyn ıgerý kezindegi zańdylyqty da nazarda ustaıdy. Monıtorıng kezinde 25 memlekettik organ men kvazımemlekettik sektor sýbektilerinde jalpy somasy 437,1 mln teńgeni quraıtyn taýarlar men kórsetiletin qyzmetterdiń baǵasyn negizsiz kóterý faktisi anyqtalǵan.