Jemqorlyq taqyrybyn kótergen aıtys: Aıbek Qalıev jeńimpaz boldy
KÓKShETAÝ. QazAqparat - Kókshetaýda azamattyq jaýapkershilikti, sybaılas jemqorlyqqa qarsy kúresti dáriptegen «Jańǵyrýǵa jarshymyz, jemqorlyqqa qarsymyz!» atty tuńǵysh respýblıkalyq aqyndar aıtysy ótti, dep habarlaıdy QazAqparat tilshisi.
Táýelsizdik kúnine arnalǵan jyr dodasyna QR Memlekettik qyzmet isteri jáne sybaılas jemqorlyqqa qarsy is-qımyl agenttigi men Kókshetaý qalasy ákimdigi qoldaý bildirdi. Aıtys Elbasy Nursultan Nazarbaevtyń «Bolashaqqa baǵdar: rýhanı jańǵyrý» maqalasy aıasynda jáne «Rýhanı qazyna» baǵdarlamasynyń «Aımaqtyq mádenıet, dástúr men qundylyqtar» tarmaǵynyń basty baǵytyn iske asyrýǵa arnalǵan.
QR Memlekettik qyzmet isteri agenttigi jurtshylyqpen baılanys departamentiniń dırektory Arman Berdalınniń aıtýynsha, aıtystyń maqsaty - Táýelsizdik murattary men qundylyqtaryn nasıhattaý, «Rýhanı jańǵyrý» baǵdarlamasynyń mańyzdylyǵyn pash etý. Sondaı-aq óskeleń urpaqty otansúıgishtikke tárbıelep, olardyń tanym-talǵamyn ult rýhanııatyna baǵyttaý, qazaqtyń tól óneri arqyly memlekettik tildiń mereıin arttyrý, qazirgi qoǵamda bolyp jatqan ózekti máselelerdi, onyń ishinde sybaılas jemqorlyq taqyrybyn qaýzaý - aıtysty uıymdastyrýdaǵy baǵyttardyń biri.
«Búgingi tańda jemqorlyqqa qarsy mádenıetti qalyptastyrý máselesi memlekettik saıasattyń mańyzdy baǵyttarynyń biri. Osy oraıda biz jemqorlyqpen kúresýge barynsha kúsh jumyldyryp jatyrmyz. Aqmola oblysynda bundaı erekshe aıtys alǵash ret ótkizilip otyr. Onyń basty maqsaty - aýzy dýaly aqyndardyń ótkir jyry arqyly qoǵamǵa oı tastaý» - deıdi Arman Berdalın.
Jyr dodasynda Aıbek Qalıev, Dıdar Qamıev, Aıtbaı Jumaǵulov, Aspanbek Shuǵataev, Muxtar Nııazov, Nurmat Mansurov, Nurlan Musaev, Ásem Erejeqyzy, Marat Axmetov, Jarqyn Juparxan, Qurmet Quralxan, Muxammed Qonqaev sııaqty elimizdiń ár óńirinen jınalǵan, tili ótkir, oıy ushqyr aqyndar qatysty.
Aıtysqa aqyn, ánshi, sazger Iran Tasqara, fılologııa ǵylymdarynyń kandıdaty, respýblıkalyq aıtystardyń jeńimpazy Serikzat Dúısenǵazın, M.Ǵabdýllın murajaıynyń dırektory Qudaıberli Myrzabek, sondaı-aq aqyn, QR eńbek sińirgen jattyqtyrýshy Ramazat Sáttibaev qazylyq etti.
Saıys qorytyndysy boıynsha úshinshi oryndy Qaraǵandy qalasynan kelgen Dıdar Qamıev jeńip alsa, ekinshi oryn Qyzylorda qalasynyń týmasy Muhtar Nııazovqa buıyrdy. Al birinshi orynǵa qostanaılyq Aıbek Qalıev laıyq dep tanyldy.
