Jemqorlyq qylmystarynda ákimdik qyzmetkerleriniń úlesi basym

ASTANA. QazAqparat - Sońǵy tórt jylda jemqorlyq qylmystarynda ákimdik qyzmetkerleriniń úlesi basym. Bul týraly búgin «Nur Otan» partııasy janyndaǵy Jemqorlyqqa qarsy is-qımyl respýblıkalyq qoǵamdyq keńesiniń otyrysynda 2015-2025 jyldarǵa arnalǵan Sybaılas jemqorlyqqa qarsy is-qımyl baǵdarlamasynyń oryndalýyn talqylaý kezinde QR Parlamenti Májilisiniń depýtaty, atalǵan keńestiń múshesi Tólegen Ibraev málim etti.

«Jergilikti atqarý organdaryndaǵy sybaılas jemqorlyq alańdatady. Sońǵy tórt jylda ákimdik qyzmetkerleri jasaǵan qylmystar jalpy sybaılas jemqorlyq qylmystarynyń jartysyna jýyǵyn qurap otyr», - dedi keńes múshesi.

Sarapshylardyń 4 jyl burynǵy «sybaılas jemqorlyqpen kúres boıynsha qabyldanǵan sharalar tıisti nátıje bermeı otyr» degen pikiri búgin de ózekti ekenine toqtalǵan ol, «2012-2014 jyldary sybaılas jemqorlyq qylmystaryn tirkeýdiń ortasha jyldyq deńgeıi 2218-ge teń, bul óz kezeginde 2011 jylǵy kórsetkishten 200 qylmysqa artyq. ıAǵnı, 2011 jylmen salystyrǵanda ósim 10 paıyzdy qurady», - dedi.

Onyń sózine qaraǵanda, keden organdarynda tirkelgen jemqorlyq qylmystary eki esege jýyq artty (2011 jyly - 23, 2013 jyly - 44). Bes jyl burynǵydaı sybaılas jemqorlyqtyń eń joǵary úlesi memlekettik satyp alýlar, jer qatynastary jáne bilim berý salasyna tıesili.