Jemqorlyq faktisin habarlaǵandarǵa 27 mln teńge syıaqy berildi

NUR-SULTAN. QazAqparat - Ótken jyly jemqorlyq faktisin habarlaǵan 185 adamǵa 27,3 mln teńge syıaqy berildi. Bul týraly QR Memlekettik qyzmet isteri jáne sybaılas jemqorlyqqa qarsy is-qımyl agenttigi Jurtshylyqpen baılanys departamentiniń dırektory Arman Berdalın aıtty, dep habarlaıdy QazAqparat tilshisi.

«Qazaqstanda sybaılas jemqorlyq faktisi týraly habarlaǵan nemese sybaılas jemqorlyqqa qarsy kúreste basqasha kómek kórsetken azamat qylmystyq jaýapkershilikten bosatylady. Dálelin tapqan jaǵdaıda birjolǵy aqshalaı syıaqy túrinde kótermelenýi múmkin», - dedi ol.

Onyń dereginshe, óken jyly jemqorlyqqa beı-jaı qaramaıtyn azamattardyń ótinishi boıynsha agenttiktiń Sybaılas jemqorlyqqa qarsy is-qımyl ulttyq bıýrosy birqatar jemqorlyq qylmysty anyqtady.

«2018 jyly sybaılas jemqorlyq faktileri týraly rastalǵan habarlamalary úshin 185 tulǵa 27,3 mln teńgege kótermelendi. Onyń ishinde onsha aýyr emes sybaılas jemqorlyq qylmystar boıynsha 2 azamat - 192 400 teńgege, aýyrlyǵy ortasha boıynsha 73 tulǵa - 9,04 mln teńgege, aýyr qylmystar boıynsha 106 tulǵa - 18,1 mln teńgege kótermelengen edi», - dedi A.Berdalın.

Sondaı-aq, ol osy jyldyń eki aıynda Ulttyq bıýronyń aýmaqtyq departamentterimen 29 tulǵa jalpy somasy 4,5 mln teńgege kótermelengenin aıtty. Onyń ishinde aýyrlyǵy ortasha sybaılas jemqorlyq qylmystar boıynsha 9 azamat 1,1 mln teńge, aýyr qylmystar boıynsha 20 tulǵa 3,4 mln teńge syıaqy alǵan.