Jemqorlyq faktileri memlekettik satyp alý jáne jer qatynastary salalarynda jıi kezdesedi - Qarjy polıtsııasy
ASTANA. Mamyrdyń 4-i. QazAqparat /Jasulan Amanbaıuly/ - Jemqorlyq faktileri memlekettik satyp alý jáne jer qatynastary salalarynda jıi kezdesedi.
Bul týraly búgin jýrnalısterge QR Ekonomıkalyq qylmysqa jáne sybaılas jemqorlyqqa qarsy kúres agenttiginiń Astana qalasy boıynsha departamentiniń bastyǵy Dáýlet Aıtjanov málim etti, dep habarlaıdy QazAqparat.
«Jemqorlyq dendegen vedomstvolardyń qatarynda memlekettik satyp alý jáne jer qatynastary salasyn aıtýǵa bolady. Byltyr bul salada áldeqaıda kóp quqyq buzýshylyqtar tirkeldi. Basqa organdarda jaǵdaı buǵan qaraǵanda, birshama táýir», deıdi D. Aıtjanov.
Ótken jyly Qarjy polıtsııasy jemqorlyqqa baılanysty 153 ákimshilik jáne tártiptik quqyq buzýshylyqtardy anyqtady. Solardyń ishindegi isterdiń basym bóligi qoǵam arasynda úlken terbelis týdyrǵan edi.
Sybaılas jemqorlyq kórinisterimen kúres jumystary aldyn alý sharalarymen de anyqtalady. D. Aıtjanovtyń atap kórsetkenindeı, Astana turǵyndary men memlekettik organdar arasynda bundaı sharalar keńinen qolǵa alynyp keledi. Memlekettik mekemelerde árdaıym semınarlar uıymdastyrylyp, jemqorlyqqa qarsy zańnamanyń basty qaǵıdattary túsindiriledi. «Máselen, Astanada «Jastar jemqorlyqqa qarsy» atty aktsııasy ótken bolatyn. Oǵan 52 mektep, 5 kolledj, 6 beıimdik lıtseı jáne qalanyń barlyq joǵary oqý oryndary qatystyryldy», dep atap kórsetti ol.
