Jemqorlyq bolmasa, Qazaqstan 1 jylda áleýmettik nysandarmen tolyq qamtamasyz etiler edi - Alık Shpekbaev

ASTANA. QazAqparat - Jemqorlyq bolmasa, Qazaqstanda 1 jylda 628 mektep pen 1256 balabaqsha salynar edi. Bul týraly búgin QR Sybaılas jemqorlyqqa qarsy is-qımyl ulttyq bıýrosy tóraǵasynyń orynbasary Alık Shpekbaev málim etti.

«Memlekettik sektordaǵy jemqorlyq jyl saıyn álemdik ekonomıkadan para túrinde 1,5-2 trln dollar tysqa shyǵarady. Bul shamamen JІÓ-niń 2 paıyzy. Eger Qazaqstanǵa keletin bolsaq, JІÓ-niń 2 paıyzy 1 trln. 250 mlrd. teńgege sáıkes keledi. Osy qarajatqa biz 1 jylda 628 mektep pen 1256 balabaqsha sala alamyz. 1 jyldyń ishinde biz áleýmettik nysandarmen tolyq qamtamasyz etiler edik», - dedi ol búgin QR «Atameken» UKP otyrysynda.
Onyń sózine qaraǵanda, qazirgi ýaqytta jemqorlyqty túbegeıli joıa bilgen esh memleket joq, alaıda onyń deńgeıin meılinshe tómen túsirgen elder bar. Damyǵan jáne baı memleketterde elıtarlyq jemqorlyq basym bolsa, Qazaqstan sekildi damýshy memleketterde ol turmystyq, buqaralyq sıpatqa ıe.