Jemqorlyq babymen sottalǵan Atyraý oblysy ákimi birinshi orynbasarynyń úkimi ózgerissiz qaldy

ATYRAÝ. QazAqparat – Atyraý oblystyq sotynyń qylmystyq ister jónindegi sot alqasy oblys ákiminiń burynǵy birinshi orynbasary Nurlan Taýbaev pen qurylys basqarmasynyń burynǵy basshysy Tımýr Basarovqa qatysty sot úkimin ózgerissiz qaldyrdy, dep habarlaıdy QazAqparat.

Budan buryn Atyraý oblysy ákiminiń burynǵy birinshi orynbasary 10 jylǵa sottalǵanyn jazǵan edik.

Oblys ákiminiń burynǵy birinshi orynbasary bolǵan Nurlan Taýbaev QR Qylmystyq kodeksiniń 24-babynyń 3-bóligi jáne 366-babynyń 4-bóliginde kózdelgen qylmystardy jasaǵany úshin kináli dep tanylǵan bolatyn.

Oǵan memlekettik qyzmetti atqaratyn laýazymdy adamnyń qorqytyp alý jolymen, adamdar tobynyń aldyn ala sóz baılasýymen asa iri mólsherde para alýǵa oqtalýy degen aıyp taǵylǵan.

Al, oblystyq qurylys basqarmasynyń burynǵy basshysy Tımýr Basarov QR Qylmystyq kodeksiniń 28-babynyń 5-bóligimen, 24-babynyń 3-bóligimen, 366-babynyń 4-bóligimen (atalǵan is-áreketterge kómektesý) kináli dep tanylǵan.

Sot úkimimen Nurlan Taýbaev 10 jylǵa, Tımýr Basarov 5 jylǵa bas bostandyǵynan aıyryldy.

«Apellıatsııadaǵy is sottalýshy Nurlan Taýbaevtyń advokattarynyń apellıatsııalyq shaǵymdary jáne prokýrordyń apellıatsııalyq ótinishi boıynsha qaraldy. Advokattar úkimniń kúshin joıýdy, sottalýshyny aqtaýdy suraǵan. Qylmystyq ister jónindegi sot alqasy úkimdi ózgertý nemese kúshin joıý jáne apellıatsııalyq shaǵymdar men prokýrordyń apellıatsııalyq ótinishhatynyń dálelderin qanaǵattandyrý úshin negiz joq degen qorytyndyǵa keldi. Sot alqasynyń qaýlysymen birinshi satydaǵy sottyń Taýbaev pen Basarovqa qatysty úkimi ózgerissiz, apellıatsııalyq shaǵymdar men prokýrordyń apellıatsııalyq ótinishhaty qanaǵattandyrýsyz qaldyryldy», -dep habarlady Atyraý oblystyq sotynyń baspasóz qyzmeti.