Jemqorlyq: Atyraýda aýrýhana dırektory sottalyp, aýyl ákimi úıqamaqqa alyndy

ATYRAÝ. QazAqparat – Atyraý oblysynda aýrýhana dırektory sottalyp, aýyl ákimi úıqamaqqa alyndy, dep habarlaıdy QazAqparat.

Sybaılas jemqorlyqqa qarsy is-qımyl agenttigi Atyraý oblysy boıynsha departamenti basshysynyń birinshi orynbasary Aıdos Mamyttyń aıtýynsha, Qurmanǵazy aýdandyq ortalyq aýrýhanasynyń burynǵy dırektoryna qatysty sot otyrysyna árptesteri qatysqan.

«Bıyl departamenttiń bastamasymen Atyraý sottarynda memlekettik qyzmetshiler arasynda sybaılas jemqorlyqtyń aldyn alýdyń jańa tásili qoldanyla bastady. Máselen, jaqynda Qurmanǵazy aýdandyq ortalyq aýrýhanasynyń burynǵy dırektoryna áriptesteriniń qatysýymen úkim shyǵaryldy. Endi sybaılas jemqorlyq baptary boıynsha úkim sottalýshynyń eńbek etken ujymynyń qatysýymen jarııalanady» - deıdi Aıdos Mamyt.

Onyń aıtýynsha, sottalýshy QR Qylmystyq Kodeksiniń 361-babynyń 1-bóliginde, 189-babynyń 3-bóliginiń 2-tarmaǵynda kózdelgen qylmysty jasaǵany úshin kináli dep tanylǵan.

Oǵan 1 jyl bas bostandyǵyn shekteý túrindegi jaza taǵaıyndaldy.

Memlekettik organdar men kvazımemlekettik uıymdarda laýazymdardy atqarý quqyǵynan ómir boıyna aıyryldy.

«Qurmanǵazy aýdanyndaǵy bir aýyldyq okrýgtiń ákiminiń ústinen qylmystyq is qozǵaldy. Aýyldyq okrýg ákimine qatysty memlekettik satyp alýda artyqshylyq kórsetkeni úshin jeke kásipkerlik ókilinen para alý deregimen qylmystyq is tergelýde. Qazir kúdiktige úı qamaqqa alý túrindegi bultartpaý sharasy sanktsııalandy» -dep málim etti Aıdos Mamyt.

Eske sala ketelik, budan buryn Atyraýda jyl basynan beri 42 adam jemqorlyq boıynsha sottalǵanyn jazǵan edik.