Jemqorlyǵy úshin sottalǵan Aqtóbe qalasy ákiminiń orynbasary jazasyn bostandyqta óteıdi
Aqtóbe qalasy ákiminiń orynbasary Jangeldi Áýbákirov, qalalyq turǵyn úı – kommýnaldyq sharýashylyq bólimi basshysynyń mindetin atqarýshy Nurlan Dosov, merdiger mekeme basshysy S.Janasbaev, bas esepshi D.Dúısembı, jeke kásipker N.Mustafınge qatysty qylmystyq is qaralyp, olar 5 jyldan 7 jylǵa deıin bas bostandyǵynan aıyrylǵan
bolatyn.
Keıin is Aqtóbe oblystyq sotynyń qylmystyq ister jónindegi sot alqasynda qaralyp, sot úkimi ózgertildi, sottalǵandardyń is-áreketteri qaıta saralandy.
Іs materıalyna súıensek, Aqtóbe qalasy ákiminiń orynbasary Jangeldi Áýbákirov 2019 jyly qalalyq turǵyn úı - kommýnaldyq sharýashylyq bólimi basshysynyń mindetin atqarýshy Nurlan Dosovty «KDS-Astana» JShS-men kelisimshartqa otyrýǵa, jańa jyldyq bezendirý úshin 100 mln teńge aqsha aýdarýǵa kóndirgen. Dosov bıýdjet qarajatynan seriktestiktiń esepshotyna 30 mln teńge aýdardy. Sodan keıin oryndalǵan jumystar aktisine qol qoıdy, taǵy 70 mln teńgeni berdi. Bul rette jańa jyldyq áshekeılerdi jetkizý júzege asyrylmady. Prokýror birinshi satydaǵy sottyń úkimin ózgerissiz qaldyrýdy surady. Sottalǵandar men olardyń qorǵaýshy advokattary úkimniń kúshin joıýdy jáne sottalǵandardy aqtaýdy surady.
«Qylmystyq kodekstiń 361-baby 4-bóliginiń sanktsııalary 7 jylǵa deıingi merzimge bas bostandyǵyn shekteý ne sol merzimge bas bostandyǵynan aıyrý túrindegi balama jazany kózdeıdi. Alqa qylmystyq jaýaptylyq pen jazany jeńildetetin mán-jaılardy, atap aıtqanda, kináni moıyndaýy, olardyń árqaısysynyń kámelet jasqa tolmaǵan balasynyń bar ekeni, alǵash ret qylmystyq jaýapqa tartylǵany, jumys orny men turǵylyqty jeri boıynsha jaqsy minezdemesi nazarǵa alynyp, Jangeldi Áýbákirov pen Nurlan Dosovqa 4 jyl merzimge bas bostandyǵyn shekteý túrindegi jaza,
S.Janasbaev, D.Dúısembı, N.Mustafınniń árqaısysyna 3 jyl merzimge bas bostandyǵyn shekteý túrindegi jaza taǵaıyndaldy. Barlyq sottalǵandar ómir boıy memlekettik qyzmette jumys isteý quqyǵynan aıyryldy. Sot úkimi zańdy kúshine endi», - dep habarlady oblystyq sottyń baspasóz qyzmeti.