Jemqorlyqpen kúres: quqyq qorǵaý qyzmetkerlerin testileýdi retteıtin normalar engiziledi
ASTANA. KAZINFORM — Parlament Májilisiniń qaraýyna «Kásibı parasattylyqqa testileý týraly» zań jobasy men ilespe qujat kelip tústi.
— Atalǵan zań jobasy Qazaqstan Respýblıkasynyń Sybaılas jemqorlyqqa qarsy saıasatynyń 2022-2026 jyldarǵa arnalǵan tujyrymdamasyna negizdelip, Úkimet tarapynan engizildi. Qujatta jemqorlyq faktilerin bolǵyzbaý maqsatynda quqyq qorǵaý jáne azamattyq qorǵaý organdary qyzmetkerlerin testileýdi retteıtin normalar kózdelgen. Olardyń quqyqtary men mindetteri reglamenttelip, testileý taǵaıyndaý negizderi jáne testileý nátıjeleri boıynsha jaýapkershilik sharalary qarastyrylǵan, — dedi Májilis depýtaty Snejanna Imasheva palatanyń jalpy otyrysynda.
Bul turǵyda qyzmetinde adal emes qyzmetshiler ýaqytyly anyqtalyp, yqtımal syıbaılas jemqorlyq áreketterinen qoǵamǵa keletin zalaldyń aldyn alý múmkindigi bolady.
— Bul óz kezeginde halyqtyń osy organdarǵa degen senimin arttyrýǵa yqpal etedi. Іlespe zań jobasynda memlekettik quqyqtyq statıstıka, quqyq qorǵaý qyzmeti týraly, derbes derekter jáne olardy qorǵaý jóninde, sondaı-aq sybaılas jemqorlyqqa qarsy is-qımyl týraly zańdarǵa ózgeris pen tolyqtyrý engizý qarastyrylǵan. Atap aıtqanda, quqyq qorǵaý qyzmetine qabyldanar aldynda úmitker testileýge qatysýy múmkin ekendigi týraly aldyn ala jazbasha habardar etiledi. Májilistiń Zańnama jáne sot-quqyqtyq reforma komıteti zań jobasy boıynsha qorytyndy ázirleýge daıyn, — dedi depýtat.
Eske sala keteıik, jaqynda Memleket basshysy Sybaılas jemqorlyqqa qarsy is-qımyl agenttiginiń tóraǵasy Ashat Jumaǵalıdy qabyldady. Prezıdentke Sybaılas jemqorlyqqa qarsy is-qımyl agenttiginiń elimizde qabyldaǵan sharalary týraly esep berildi.