Jemqorlyqpen kúres qyzmeti «Jaıly mektep» jobasyna bólingen qarjyny baqylaýǵa aldy

ASTANA. KAZINFORM - Sybaılas jemqorlyqqa qarsy qyzmet «Jaıly mektep» ulttyq jobasy aıasynda 2,3 trln teńgeniń ıgerilýin monıtorıngke aldy, dep habarlaıdy QR Sybaılas jemqorlyqqa qarsy is-qımyl agenttiginiń baspasóz qyzmeti.

Baspasóz qyzmetiniń málimetterine qaraǵanda, Sybaılas jemqorlyqqa qarsy is-qımyl agenttigi tóraǵasynyń birinshi orynbasary U.S. Sarqulovtyń basshylyǵymen «Jaıly mektep» ulttyq jobasyn iske asyrý máseleleri boıynsha keńes ótti.

Májiliste ýákiletti organdardyń ókilderi jáne basqa da múddeli tulǵalar qatysty.

Jobany iske asyrý kezinde zańdylyq pen ashyqtyqty qamtamasyz etý, sondaı-aq jemqorlyq táýekelderiniń aldyn alý máselelerin qarady.

«Jaıly mektep» jobasy el damýynyń basym baǵyttarynyń biri bolyp tabylady. Búgingi tańda Qazaqstanda 37 apatty jáne 3 aýysymda oqıtyn 142 mektep bar. Jobany iske asyrý sheńberinde 2025 jylǵa qaraı 800 myń oqýshy ornyn qamtamasyz etý josparlanyp otyr.

Esterińizge sala keteıik, Memleket basshysy Qasym-Jomart Toqaev 2022 jyly óz Joldaýynda «árbir qazaqstandyq oqýshynyń oqýy men jan-jaqty damýy úshin laıyqty jaǵdaılar bolýy tıis. «Jaıly mektep» jańa ulttyq jobasy dál osy maqsatqa baǵyttalǵan» dep atap ótti.

Sondyqtan Sybaılas jemqorlyqqa qarsy qyzmet pen tıisti ýákiletti organdar úshin jumystaǵy mańyzdy basymdyq búkil el boıynsha jaıly mektepter qurylysy barysyn monıtorıngteý bolady.

«Keńes qorytyndysy boıynsha jemqorlyq quqyq buzýshylyqtarǵa jol bermeý, sondaı-aq olardy ýaqtyly jáne sapaly salý maqsatynda jaýapty organdar men «Samruk-Kazyna Construction» AQ Ulttyq jobany iske asyrý boıynsha ózara is-qımyl algorıtmi ázirlendi», - delingen hbarlamada.