Jemqorlyqpen kúres qyzmeti izdeýdegi adamnyń 2,3 mlrd teńgeden asatyn múlkin tárkiledi

ASTANA. KAZINFORM - Sybaılas jemqorlyqqa qarsy qyzmet izdeýde júrgen tulǵadan quny 2,3 mlrd teńgeden astam múlkin tárkiledi, dep habarlaıdy QR Sybaılas jemqorlyqqa qarsy is-qımy agenttiginiń baspasóz qyzmeti.

Baspasóz qyzmetiniń málimetterine qaraǵanda, sybaılas jemqorlyqqa qarsy qyzmet Memleket basshysynyń tapsyrmasyn oryndaý aıasynda aktıvterdi qaıtarý jáne keltirilgen zalaldy óteý boıynsha jumysty jalǵastyryp jatyr. Ony iske asyrýdyń bir tásili zańsyz jolmen alynǵan múlikti sotqa deıin tárkileý bolyp tabylady. Ol halyqaralyq izdestirýge jarııalanǵan ne olarǵa qatysty raqymshylyq jasaý aktisiniń saldarynan, eskirý merziminiń ótýine nemese qaıtys bolýyna baılanysty qylmystyq qýdalaý toqtatylǵan adamdarǵa qoldanylady.

Sybaılas jemqorlyqqa qarsy qyzmet qabyldaǵan sharalardyń nátıjesinde 2022 jyldan beri halyqaralyq izdeýde júrgen jáne aqshany zańdastyrýǵa qatysy bar dep kúdikke ilingen tulǵanyń aqshalaı qarajaty men múliktik aktıvteriniń qylmystyq jolmen alynǵany dáleldendi. Ol jyljymaly jáne jyljymaıtyn múliktiń qymbat nysandaryn, onyń ishinde jubaıyna resimdelgen nysandardy satyp alý úshin shamamen 1,5 mlrd teńge zańǵa qaıshy aqshany paıdalanǵan. Olardyń qataryna Almaty qalasy men Almaty oblysyndaǵy lıýks avtomobıl, páter, jer ýchaskeleri, turǵyn úıler men qurylystar jatady.

Qarjylyq tergeý qosymsha 1,7 mln AQSh dollaryn (872 mln teńgeden astam) jáne Qazaqstannyń ekinshi deńgeıdegi bankterindegi aıyptalýshy men onyń jubaıynyń shottarynda 47 mln teńge anyqtady. Olar qylmys jasaý kezeńinde alynǵan jáne olardyń resmı tabystaryna sáıkes kelmeıdi. Aǵymdaǵy jylǵy 16 maýsymdaǵy sot qaýlysymen aqshalaı qarajat pen múliktik obektiler memleket kirisine tárkilendi.

Jalpy, jyl basynan beri Sybaılas jemqorlyqqa qarsy qyzmet qylmystyq jolmen alynǵan aqshany jáne ózge de múlikti zańdastyrý (jylystatý) faktileri boıynsha otyzǵa jýyq qylmystyq isti tergeýdi bastady.

Іstiń bir bóligi sotqa jiberilip, aıyptaý úkimi shyǵaryldy. Zańǵa qaıshy tabystar týystarynyń, affılıırlengen kompanııalardyń atynan zańdy operatsııalar retinde búrkemelenetin, qymbat múlikti, krıptovalıýtalardy, baǵaly qaǵazdardy, onyń ishinde ınvestıtsııalyq quraldardy qoldana otyryp satyp alýda paıdalanylatyn jaǵdaılarǵa erekshe nazar aýdarylady.

Mysaly, sportty damytýǵa bólingen bıýdjet qarajatynan 745 mln teńgeden astam somany jymqyrý faktisi boıynsha qylmystyq jaýapkershilikke tartylyp jatqan burynǵy laýazymdy adamnyń qarjylyq aǵyndaryna júrgizilgen taldaý nátıjesinde, onyń qylmystyq jolmen alynǵan qarajatqa eki qymbat avtokólik satyp alǵany jáne 240 mln teńgeden astam somany joǵary tabys alý maqsatynda ózi baqylaýyndaǵy kompanııanyń shotyna aýdarǵany anyqtaldy.

Taǵy bir jaǵdaı, kúdiktiler jeke kásipker bolyp tabylatyn týystary arqyly ınfraqurylymdyq, qala qurylysy jobalaryn iske asyrýǵa bıýdjetten bólingen 237 mln teńgeden astam qarajatty qolma-qol aqshaǵa aınaldyryp, olardan páterler, avtokólikter jáne basqa da múlikter satyp alǵan.

- Sottyń sanktsııasymen múliktik obektilerge tyıym salyndy. Qylmystyq is júrgizý kodeksiniń 201-babyna sáıkes tergeý múddesinde ózge deaqparat jarııa etilýge jatpaıdy. Aktıvterdi qaıtarý boıynsha jumys jalǵasýda, - delingen habarlamada.

Osyǵan deıin jemqorlyq babymen túrmede otyrǵan 624 adamǵa raqymshylyq zańy «kómektese» ala ma, degen taqyrypta saraptama jarııalaǵan edik.