Jemqorlyqpen kúres. Qazaqstan nelikten Grýzııa jolymen júrmeıdi

ASTANA. KAZINFORM — Ózge elderde jemqorlyqpen kúreske baǵyttalǵan revolıýtsııalyq ádis barlyq ýaqytta birdeı Qazaqstanǵa saı kele bermeıdi.

Bul týraly Sybaılas jemqorlyqqa qarsy is-qımyl agenttiginiń tóraǵasy Ashat Jumaǵalı Jibek Joly telearnasynyń «Ýáde» baǵdarlamasyna bergen eksklıýzıvti suhbatynda aıtty.

Qazaqstan nelikten Grýzııa stsenarııin qaıtalamaıdy?

2000 jyldardyń basynda Grýzııa ishki ister mınıstrligi qyzmetkerlerin jappaı jumystan bosatyp, memlekettik qyzmet júıesin qaıta iske qosqan bolatyn. Bul bastama jemqorlyqqa qarsy qýatty áser bergen edi. Al agenttik tóraǵasy Ashat Jumaǵalı ózgeniń mundaı reformalaryn basy-kózi joq kóshirip alý barlyq ýaqytta tıimdi bolmaıtyndyǵyn alǵa tartady.

— Eldiń qandaı bir tájirıbesin, halyqaralyq tájirıbeni, quraldy alyp jaı ǵana kóshirýdi, ony qoǵamymyzda, qurylymdarymyzda, memleketimizde qoldanýdy jaqtamaımyn. Árbir jaǵdaıdyń, ár memlekettiń ózindik erekshelikteri — tıisti quqyqtyq júıesi, adamdardyń sana-sezimi, adamgershiligi, mádenıeti bar, — dep sanaıdy ol.

Osy oraıda baǵdarlama júrgizýshisi memlekettik qyzmetshilerdiń jalaqysyn kóterý arqyly jemqorlyqpen kúreste jetistikke jetken Sıngapýr men Danııany mysalǵa keltire otyryp, Qazaqstanda da mundaı bastama jumys isteýi múmkin be ekendigin suraǵan bolatyn.

Asqar Jumaǵalıdyń aıtýynsha, sheneýnikterdiń tabysynyń artýy shynymen de olardyń para alýǵa degen yntasyn tómendetedi. Búginde bul elimizdegi jemqorlyqqa qarsy sharalardyń bóligi sanalady.

— Árıne, eger memlekettik qyzmetshi óziniń mindetterin laıyqty deńgeıde oryndasa jáne áleýmettik paketi bolsa, onda jaqsy jalaqy alady. Bul jemqorlyq áreket múmkindigin jáne ony jasaýǵa degen nıetti aıtarlyqtaı tómendetedi, — dedi ol.

Buǵan deıin Antıkor basshysy elimizdegi tsıfrlyq «boıalǵan» aqsha jobasynyń alǵashqy nátıjesi jaıly aıtyp bergenin jazǵan edik.

Budan bólek ol memlekettik qyzmetshiler tekserýshi organdardan qorqatyndyqtan sheshim qabyldaý barysynda jıi qaýiptenetinin atap ótti.