Jemqorlyqqa qarsy kúresti tıimdi júrgizý úshin jańa tásilder qajet - Toqaev

ASTANA. KAZINFORM — Memleket basshysy Qasym-Jomart Toqaev quqyq qorǵaý organdarynyń keńeıtilgen alqa májilisinde sybaılas jemqorlyqpen kúres máselesin qozǵady. 

- Jemqorlyqqa qarsy kúresý úshin naqty, júıeli sharalar qabyldanyp jatyr. Meniń tapsyrmammen sot arqyly jemqorlardan alynǵan qarajat mektepter salýǵa jumsalýda. Úsh jyldyń ishinde 89 mekteptiń qurylysyna 150 mıllıard teńgeden astam qarajat berildi (sonyń ishinde 61 mektep paıdalanýǵa berildi).

Degenmen qazirgi saıası jáne áleýmettik-ekonomıkalyq jaǵdaıda jemqorlyqqa qarsy kúresti tıimdi júrgizý úshin jańa tásilder qajet. Biz qonaqjaılyq ındýstrııasynyń áleýetin maqsatty túrde nyǵaıtyp, týrızmdi damytamyz jáne sheteldik qonaqtarymyzdyń qaýipsizdigin qamtamasyz etýge basa mán beremiz, - dedi Prezıdent.

Ol búginde Qazaqstanǵa kelgen árbir týrıske áýejaıdan qaýipsizdik jadynamasymen birge mobıldi baılanys pen bazalyq ınternet paketi bar jańa sım-karta beriletinin eske saldy.

- Qazaqstandy jaıly ári qaýipsiz memleket etý – bárimizge ortaq mindet. Biz azamattardyń quqyǵy men bostandyǵyn qorǵaı bilýimiz kerek. El ishindegi tynyshtyq pen tártiptiń saqtalýyn qamtamasyz etý asa mańyzdy. Bul – halyqtyń ál-aýqaty men elimizdiń tabysty damýyna tikeleı yqpal etetin faktor. Sondyqtan biz búkil quqyq qorǵaý júıesiniń áleýetin arttyrýymyz qajet. Osylaısha, Qazaqstan aımaqtaǵy qaýipsizdikti qamtamasyz etýge zor úles qosatyn el retindegi mártebesin nyǵaıta bermek.

Quqyq qorǵaý organdary túbegeıli ózgeristerge daıyn bolýǵa tıis. Túıtkildiń bárin jan-jaqty oılastyryp, josparly túrde sheshý qajet. Quzyrly organdardyń negizgi maqsaty – naqty nátıjege qol jetkizý, - dedi Qasym-Jomart Toqaev.

Eske salaıyq, buǵan deıin Prezıdent memleketke qyzmet etý – eń qurmetti ári asa jaýapty mindet ekenin jetkizdi.