Jemqorlyq jaıly habarlaǵan azamattarǵa 14,7 mln teńgege deıin syıaqy beriledi – Antıkor

ASTANA. KAZINFORM – Sybaılas jemqorlyqqa qarsy is-qımyl agenttigi sybaılas jemqorlyq quqyq buzýshylyq faktisi týraly habarlaǵan nemese basqa da joldarmen jemqorlyqqa qarsy is-qımylǵa járdem kórsetken azamattarǵa birjolǵy aqshalaı syıaqy tólenetinin eske saldy. 

«Syıaqy berý qaǵıdalarymen reglamenttelgen, jemqorlyqqa nóldik tózbeýshilikti qalyptastyrý men azamattyq qoǵamdy osy qaýipti áleýmettik qubylysqa qarsy kúreske tartýdyń tıimdi tetigi. 2020 jyly syıaqy berý erejelerine ózgerister engizildi. Ekonomıkalyq yntymaqtastyq jáne damý uıymy (Germanııa, Ulybrıtanııa, AQSh) elderiniń tájirıbesi boıynsha syıaqy somasy saralandy», - dedi agenttiktiń resmı ókili Danııar Bıgaıdarov vedomstvoda ótken baspasóz máslıhatynda.

Antıkordyń resmı ókili, sybaılas jemqorlyq faktileri týraly habarlaǵany úshin 14 mln 768 myń teńgege deıin syıaqy alýǵa bolatynyn aıtyp otyr.

«Bıyl 9 aıda agenttiktiń aýmaqtyq departamentteri sybaılas jemqorlyqqa qarsy is-qımylǵa kómek kórsetkeni úshin 76 adamdy 28,9 mln teńge kóleminde qarjylaı syıaqy berdi. Onyń ishinde 33 memlekettik qyzmetshi alǵys hattarmen marapattaldy», - deıdi ol.

Agenttiktiń jedel jelisine kóbine qylmystyq jáne ákimshilik jaýapkershilikke tartpaǵany, ókilettikterin asyra paıdalanǵany, qamqorshylyǵy, memlekettik satyp alý salasyndaǵy zań buzýshylyqtar jáne laýazymdy adamdardyń basqa da zańsyz jáne bopsalaý áreketteri boıynsha habarlasady eken.

«Eń kóp marapattalǵan óńirler qatarynda Qaraǵandy, Aqtóbe jáne Batys Qazaqstan oblysy, bul aımaqtarda 8-den 10 adamǵa deıin syıaqy alǵan. Sybaılas jemqorlyq áreketter týraly memlekettik qyzmetshiler jibergen habarlamalardyń da sany artyp keledi», - dep tolyqtyrdy D. Bıgaıdarov.