Jemqorlyq týraly habarlaǵan almatylyqtarǵa 1,2 mln teńge syıaqy berildi

ALMATY. KAZINFORM — Almatyda jemqorlyq týraly habarlaǵan eki adamǵa 1,2 mln teńge syıaqy berildi. 

Almaty qalasy boıynsha Sybaılas jemqorlyqqa qarsy is-qımyl agenttigi departamentiniń basshysy Arman Rahımovtyń aıtýynsha, jyl basynan beri jemqorlyqpen kúreske baǵyttalǵan 66 is-shara ótti. Oǵan 5 myńnan astam adam qatysty.

— Sybaılas jemqorlyqqa qarsy mádenıetti qalyptastyrý — bizdegi basty basymdyqtyń biri. Biz aldyn alý, aǵartý jáne azamattyq jaýapkershilikke erekshe mán beremiz, — dedi ol óńirlik kommýnıkatsııalar qyzmetinde ótken baspasóz máslıhatynda.

Spıkerdiń sózinshe, «Sybaılas jemqorlyqqa qarsy volonterlik» jobasy aıasynda Almatyda 262 erikti jumys isteıdi.

— Bul joba jastar arasynda ashyqtyq pen ádilettilik qaǵıdattaryn nasıhattaıtyn tıimdi alańǵa aınaldy, — dep atap ótti ol.

Sonymen qatar, ol bıyl sybaılas jemqorlyq faktileri týraly habarlaǵan eki adam 1,2 mln teńge syıaqy alǵanyn tilge tıek etti.

— 2024 jyly barlyǵy 9 azamat marapattalyp, olardyń altaýy 5,2 mln teńge kóleminde aqshalaı syıaqy aldy, — dedi departament basshysy.

Eske salaıyq, qazaqstandyqtar jemqorlyq týraly habarlaǵany úshin 15,7 mln teńgege deıin syıaqy ala alady.