Jemqorlyq táýekelderin joımaǵan basshylarǵa jaza qoldanylady

ASTANA. KAZINFORM – Laýazymdy adamdardyń jemqorlyqqa qarsy sharalardy qabyldamaǵany úshin jaýaptylyǵynyń quqyqtyq tetikteri jetildiriledi. Bul týraly Májilistiń jalpy otyrysynda sybaılas jemqorlyqqa qarsy is-qımyl máseleleri boıynsha zań jobasyn talqylaý kezinde QR Sybaılas jemqorlyqqa qarsy is-qımyl agenttigi tóraǵasynyń birinshi orynbasary Ulan Sarqulov málim etti.

- Sybaılas jemqorlyqqa qarsy is-qımyl boıynsha sharalar qabyldamaǵany úshin jaýapkershiliktiń quqyqtyq tetikterin jetildirý qarastyryldy. «Sybaılas jemqorlyqqa qarsy is-qımyl týraly» Zańǵa sáıkes, sybaılas jemqorlyq táýekelderin syrtqy jáne ishki taldaý nátıjeleri boıynsha memlekettik organdar, uıymdar jáne kvazımemlekettik sektor sýbektileri sybaılas jemqorlyqtyń týyndaý sebepteri men jaǵdaılaryn joıý jóninde sharalar qabyldaıdy. Syrtqy taldaýdy Agenttik júrgizedi, sybaılas jemqorlyq táýekelderine ishki taldaýdy – memlekettik organdar men kvazımemlekettik sektor sýbektileri derbes júrgizedi. Bul taldaýlardyń qorytyndylary boıynsha Sybaılas jemqorlyq quqyq buzýshylyqtar jasaýǵa yqpal etetin sebepter men jaǵdaılardy joıý jónindegi is-sharalar jospary bekitiledi. Іs júzinde memlekettik organdar men kvazımemlekettik sektor sýbektileri sybaılas jemqorlyq táýekelderin joıý jónindegi usynymdardy oryndaýdy keshiktiretin jaǵdaılar oryn alady. Bul óz kezeginde jańa sybaılas jemqorlyq quqyq buzýshylyqtar jasaýǵa alyp keledi, - dedi Ulan Sarqulov.

Osyǵan baılanysty, «Sybaılas jemqorlyqqa qarsy is-qımyl týraly» Zań basshylarǵa tártiptik jaza qoldaný úshin «sybaılas jemqorlyq quqyq buzýshylyqtar jasaýǵa yqpal etetin sebepter men jaǵdaılardy joımaý» sııaqty negizdememen tolyqtyrylady.

Budan buryn habarlanǵandaı, bul zań jobasy aıasynda aýyr jáne asa aýyr sybaılas jemqorlyq qylmystar jasaǵany úshin sottalǵandardyń jarııa tizilimi engiziledi.