Jemqorlyq sımvoly: Astanadaǵy 1 mlrd teńgeniń sýburqaǵy qalpyna keltirile me

ASTANA. KAZINFORM – Elorda turǵyny Esil jaǵalaýynda qańyrap turǵan alyp saǵat formasyndaǵy sýburqaqty qalpyna keltirý máselesin kóterdi. 

Atalǵan másele búgin elorda ákimi Jeńis Qasymbek «Almaty» aýdany turǵyndarymen kezdesýi barysynda qozǵaldy.

– Dál qazir qalpyna keltiremiz be, joq pa, aıta almaımyn. Qalpyna keltirý óte qymbatqa túsedi, biraq, buzýdyń da shyǵyny az bolmaıdy. Sol sebepti baıypty sheshim qabyldanady. Biz qala turǵyndarymen aqyldasyp, ortaq pikirge súıene otyryp sheshim qabyldaımyz. Biraq, pikirler ártúrli, bireýler ony buzýdy talap etse, endi bireýler qaldyrýdy surap otyr, - dep jaýap berdi Jeńis Qasymbek turǵyn saýalyna. 

Eske sala ketsek, 2016 jyly Astana kúni merekesine oraı salynǵan «Kún» (Esil ózenindegi jaryq-ıllıýmınatsııalyq jáne ot shoýy) sýburqaǵynyń qurylysy aınalasynda jemqorlyq daý shyqqan edi. 

Atalǵan jemqorlyq daý boıynsha kúdikti retinde 2024 jyly qyrkúıekte Bolat Majaǵulov ustaldy. 

Qarjylyq monıtorıng agenttigi Astana qalasynyń Mádenıet basqarmasynyń burynǵy basshysy men merdiger uıym ókilderine qatysty asa iri kólemde bıýdjet qarajatyn (1 mlrd teńge) jymqyrý kúdigine ilikkenin habarlady.

Urlanǵan qarajattyń kólemi 1 mlrd teńgeden asyp otyr. Kúdikti, Astana qalasynyń Mádenıet basqarmasynyń burynǵy basshysy ustalyp, ýaqytsha ustaý ızolıatoryna qamaldy. Tergeý aıasynda onyń múlkine tyıym salyndy.

Onyń ishinde 3 kommertsııalyq nysan, 2 avtoturaq orny jáne Astana qalasyndaǵy premıým sanattaǵy páter bar. Atalǵan is boıynsha kúdiktilerge tıesili 572 mıllıon teńgeniń múlkine shekteý qoıyldy.

Bıyl qańtarda Bolat Majaǵulov 8,5 jylǵa sottaldy.