Jemqorlyq daýynan keıin BQO densaýlyq saqtaý basqarmasynyń basshysy jumysynan bosatyldy
ORAL. KAZINFORM – BQO densaýlyq saqtaý basqarmasynyń basshysy Madııar Óteshev óziniń ótinishine baılanysty qyzmetinen bosatyldy.
Kazinform budan buryn habarlaǵanyndaı, M.Óteshev Batys Qazaqstan oblysynyń ákimi Narıman Tóreǵalıevtiń 2026 jylǵy 3 maýsymdaǵy ókimimen 1 aı merzimge qyzmetinen shettetilgen bolatyn.
BQO densaýlyq saqtaý basqarmasy basshysynyń mindetin atqarýshy Aınash Ǵubaıdýllınanyń óńirlik kommýnıkatsııalar qyzmeti alańynda ótken brıfıngte málim etkenindeı, M.Óteshev óz ótinishimen qyzmetinen bosatyldy.
Bıylǵy mamyr aıynda Batys Qazaqstan oblysynda jeti medıtsınalyq mekeme basshylary sybaılas jemqorlyqqa baılanysty ustalǵan bolatyn.
A.Ǵubaıdýllınanyń sózine qaraǵanda, qazirgi tańda bul aýrýhanalar men emhanalarda basshylyq qyzmetinde mindetin atqarýshylar jumys istep jatyr.
- Osy oqıǵadan keıin óńirde densaýlyq saqtaý salasynda sybaılas jemqorlyqtyń aldyn alý baǵytynda barlyq medıtsına uıymdarynda túsinik jumystary júrgizilip, arnaıy semınar ótkizildi, - dedi A.Ǵubaıdýllına.
Eske sala keteıik, budan buryn BQO densaýlyq saqtaý basqarmasynyń basshysy qyzmetinen shettetilgenin jazǵan edik.
Sondaı-aq BQO-da para alǵan aýdandyq aýrýhana basshysy úsh jylǵa sottaldy.
