Jemqorlyq áreketi dáleldengender saılana almaıdy – Konstıtýtsııalyq reforma

ASTANA. KAZINFORM – Senat depýtaty Nurlan Beknazarov Konstıtýtsııalyq reforma jónindegi komıssııanyń ekinshi  otyrysynda Ata zańǵa jemqorlardyń saılaný quqyǵyn shekteıtin norma engizýdi usyndy.

- Sot áreketke qabiletsiz dep tanyǵan jáne sot úkimimen bas bostandyǵynan aıyrý oryndaryndaǵy Qazaqstan Respýblıkasy azamattarynyń saılaýǵa, respýblıkalyq referendýmǵa qatysýǵa quqyǵy joq. Sonymen qatar sot áreketke qabiletsiz dep tanyǵan, zańda belgilengen tártippen joıylmaǵan nemese alynbaǵan sottylyǵy bar, sondaı-aq, sybaılas jemqorlyq qylmys nemese quqyq buzýshylyq jasaýda kinási sotta belgilengen tártippen tanylǵan azamattardyń saılanýǵa quqyǵy bolmaıdy, - dedi ol.

Onyń paıymdaýynsha, bul qoǵamnyń talabyna saı norma bolmaq.

- Bul jańashyl normadaǵy erekshe nazar aýdaratyn túzetý qazirgi tańda qoǵamda óte jaǵymsyz sıpat alǵan sybaılas jemqorlyq qylmys jáne quqyq buzýshylyq áreketterine qatysty talaptardyń qatańdatylýy bolyp sanalady, - dedi Nurlan Beknazarov.

Dál qazir Konstıtýtsııalyq reforma jónindegi komıssııanyń ekinshi otyrysy ótip jatyr. 

Kazinform agenttiginiń qazaq jáne orys tilindegi Telegram arnasynda mátin translıatsııasy bolady.

Ótken aptada Konstıtýtsııalyq komıssııanyń alǵashqy otyrysy ótip, bir palataly «Quryltaıdyń» fýnktsııasy men quramy, vıtse-prezıdent laýazymynyń memlekettik bıliktegi orny, zań shyǵarý bastamasyn kóterýge haqyly «Halyq keńesiniń» quzyreti qandaı bolatyny aıtylǵan edi.