Jemqorlardyń múlikterin tárkileý kerek - Sergeı Mıronov
ASTANA. Qazannyń 27-si. QazAqparat - Sybaılas jemqorlyqpen tıimdi kúresý maqsatynda Qylmystyq kodekske «jemqordyń da, onyń otbasy músheleriniń de múlikterin tárkileý týraly» norma engizý kerek. Bul týraly Reseı Federatsııalar Keńesiniń spıkeri Sergeı Mıronov «Maıak» radıosynyń tikeleı efırinde málim etti.
«Múlikterdi tárkileýdi engizý kerek. Men tek jemqordyń ǵana emes, onyń otbasy músheleriniń de múlikterin tárkileýdi engizer edim. Deklaratsııany tek áıeline, kámeletke tolmaǵan balalaryna ǵana emes, barlyq jaqyn týystaryna - ata-anasyna, baýyrlaryna da toltyrýlary kerek»,- dep málim etti S.Mıronov.
Sondaı-aq adamdardy jumys istetý úshin, básekelestik tek ekonomıkada ǵana emes, saıasatta da bolýy kerek. Bizde bılikte bir ǵana partııa bolǵandyqtan, sheneýnik sol partııaǵa kiredi de, jeńildikterge ıe boldym dep sanaıdy. Bul durys emes. Basqa áleýetti úmitkerler sheneýniktiń izin basyp turýlary kerek, sonda ǵana ol ońdy-soldy áreketteri úshin qyzmetinen ushatynyn, salyq tóleýshiler, ıaǵnı halyq tólep otyrǵan jalaqy úshin mindetti qyzmetin atqarmasa, ornynan ketetinin túsinetin bolýy kerek», deıdi S.Mıronov.
