Jemqorlardyń tizimin jarııalaıtyn arnaıy saıt ashylýy múmkin
Elimizde jemqorlyq qylmysy boıynsha sottalǵan azamattardyń tizimi arnaıy saıtta jarııalanady. Muny BUU aıasynda Tashkentte (Ózbekstan) ótip jatqan aımaqtyq konferentsııada QR Sybaılas jemqorlyqqa qarsy is-qımyl agenttigi 1-shi qyzmet basshysynyń orynbasary Jiger Baıdildın aıtty, dep habarlaıdy Kazinform agenttiginiń menshikti tilshisi.
«Qoǵamdyq baqylaýdy kúsheıtý úshin jemqorlardyń tizimin jarııalaý sııaqty zańnamalyq normalar pysyqtalyp jatyr. Eger laýazymdy tulǵa nemese sheneýlikke qatysty sot úkimi shyǵatyn bolsa, onda ol ýákiletti organmen (Sybaılas jemqorlyqqa qarsy is-qımyl agenttigi – avt.) reestrge engiziledi. Bul – saıtta jarııa bolady. Kez-kelgen azamat onlaın túrde sol saıtqa kirip, qandaı laýazymdy tulǵa qanshaǵa, qandaı bap boıynsha sottaldy degen sııaqty derekterdi kóre alady», - dep túsindirdi Jiger Baıdildın Kazinform tilshisiniń saýalyna jaýap bere otyryp.
Ol atap ótkendeı, paraqorlar tizimin jarııalaý boıynsha áýeli zańnamalyq aktilerdi qabyldaý qajet. Agenttik dereginshe, bekitilýi múmkin ereje eshkimniń zańdy quqyǵyn shektemeýi jáne QR Konstıtýtsııasynyń talaptaryna qaıshy bolmaýy tıis.
Vedomstvonyń resmı ókili Arman Tileýkenovtiń aıtýynsha, bul júıe jumys berýshiler úshin tıimdi bolmaq. Naqty toqtalsaq, qandaı da bir kandıdatty qyzmetke almas buryn, basshy sol saıtqa kirip, ol úmitkerdiń jemqorlyq jasaǵan-jasamaǵanyn bile alady.
Sot úkimine saı jazasyn ótep, memlekettik qyzmette jumys isteýine salynǵan tyıym ýaqytyn ótkergennen keıin reestrde turǵan azamattardyń derekteri tizimnen alynyp tastalýy múmkin. Sybaılas jemqorlyqqa qarsy qyzmet agenttigi ázirge bul talaptardy pysyqtap jatyr.
