Jemqorlardan tárkilengen qarjy aýyldardy aýyzsýmen qamtýǵa jumsalady — Albert Raý
ASTANA. KAZINFORM — Qostanaı oblysyndaǵy Nıkolaevka aýylynda kóptegen jyl boıy aýyzsý máselesi týyndap kelgen bolatyn. Endi eldi mekende ortalyqtandyrylǵan sý júıesi iske qosylyp, aýyl turǵyndary taza aýyzsýmen qamtylmaq.
«AMANAT» partııasynyń bastamasymen júzege asyp jatqan ortalyqtandyrylǵan sýmen jabdyqtaý júıesiniń qurylysy osy jyldyń qarasha aıynda aıaqtalmaq. Qurylystyń barysymen Májilis tóraǵasynyń orynbasary Albert Raý men depýtat Erkin Ábil tanysty.
Búginde quny 1,3 mlrd teńgeni quraıtyn nysannyń 50 paıyzy daıyn. 11 shaqyrym jerge sý qubyry tartylyp, qudyqtar ornatylyp, sorǵy stantsııalary quryldy. Sondaı-aq dánekerleý jáne elektr-tehnıkalyq jumystar aıaqtaldy. Joba Beıimbet Maılın aýdanynyń barlyq halqyn aýyzsýmen qamtýǵa múmkindik beredi.
Májilis tóraǵasynyń orynbasary Albert Raýdyń aıtýynsha, elimizdegi barlyq eldi mekendi 100 paıyz taza aýyzsýmen qamtý — «AMANAT» partııasynyń saılaýaldy baǵdarlamasyndaǵy negizgi mindettiń biri.
— »AMANAT» partııasy fraktsııasynyń depýtattary jyl saıyn ondaǵan aýyldy aýyzsýmen qamtý jobalaryn bıýdjet josparyna engizýge yqpal etip keledi. Buǵan deıin elimizde shamamen 700 aýylda aýyzsý múlde bolmaǵan. Búginde júrgizilgen jumystardyń arqasynda bul baǵytta aıtarlyqtaı nátıjege qol jetkizdik. Partııamyzdyń tabandy ustanymynyń arqasynda arnaıy memlekettik qordan qosymsha qarajat tartyldy. Buǵan deıin jemqorlardan tárkilengen qarjy tek mektep qurylysyna jumsalsa, biz ony halyqtyń kúndelikti turmysymen tikeleı baılanysty jobalarǵa da baǵyttaý qajettigin kóterdik. Sonyń nátıjesinde elimizdiń júzdegen aýylynda sý qubyryn júrgizý múmkindigi týdy. Aldymyzda áli de úlken mindetter bar. Aýyzsýmen birge halyq jańa sport zaldaryn, mádenıet úılerin, áleýmettik nysandardyń salynýyn kútýde. Degenmen birinshi kezekte — aýyzsý máselesi. Biz ákimdiktermen jáne máslıhattarmen birlesip, árbir teńgeniń maqsatty jumsalýyn qatań baqylaýda ustaıtyn bolamyz, — dedi A.Raý.
Depýtattar jergilikti bılik ókilderi men merdiger uıymdardyń aýyldardy ortalyqtandyrylǵan sýmen jabdyqtaý máselesine qatysty esepterin tyńdady. Sondaı-aq árbir sý nysany boıynsha jumys kestesi qaraldy.
Budan buryn densaýlyq saqtaý mınıstri mindetin atqarýshynyń buıryǵymen sý obektilerin halyqty aýyzsýmen qamtamasyz etý kózderine jatqyzý qaǵıdalary bekitilgenin jazǵanbyz.