Jemqorlardan tárkilengen qarajat esebinen 89 myń oqýshyǵa oryn ashyldy
ASTANA. KAZINFORM — Memleket basshysynyń tapsyrmasymen qurylǵan Bilim berý ınfraqurylymyn qoldaý qory jemqorlardan tárkilengen qarajat esebinen tolyqtyrylyp keledi, dep habarlaıdy Oqý-aǵartý mınıstrliginiń baspasóz qyzmeti.
Osy qarajat esebinen jańadan bilim berý uıymdaryn salý, jańǵyrtý nemese mektepterge japsarlas qurylys salý júzege asyrylyp jatyr.
— Búgingi tańda qor qarajaty esebinen 89 myń oqýshy ornyna arnalǵan 81 mektep paıdalanýǵa berildi. Nysandardyń basym bóligi Almaty, Túrkistan, Qyzylorda jáne Jambyl oblystarynda, sondaı-aq Astana qalasynda ornalasqan. Barlyq bilim berý uıymdary zamanaýı qural-jabdyqtarmen jabdyqtalǵan, — delingen habarlamada.
Mınıstrlik málimetinshe, bilim berý ınfraqurylymyn qoldaý qorynyń qarajaty esebinen barlyǵy 100 myńǵa jýyq oqýshy ornyna arnalǵan 90 bilim berý uıymynyń qurylysy qarjylandyryldy. Bul sharalar elimizdiń bilim berý júıesin uzaq merzimdi damytýǵa jáne jańǵyrtýǵa baǵyttalǵan.
Osyǵan deıin Senat depýtaty Nurlan Beknazarov Konstıtýtsııalyq reforma jónindegi komıssııanyń ekinshi otyrysynda Ata zańǵa jemqorlardyń saılaný quqyǵyn shekteıtin norma engizýdi usyndy.