Jemqorlardan tárkilengen 153,3 mlrd teńgege mektep salynady — Antıkor
ASTANA. KAZINFORM — Búginde jemqorlyqpen aıyptalǵan tulǵalardan tárkilengen qarajatqa salynǵan 61 mektep paıdalanýǵa berildi.
— Sybaılas jemqorlardan tárkilengen qarajat bilim berý ınfraqurylymyn qoldaýǵa arnalǵan arnaıy qorǵa jiberiledi. Ol qarjy keıin mektep, ózge de áleýmettik nysandardy salýǵa bólinedi. Atalǵan qor qurylǵannan beri 153,3 mıllıard teńge aýdaryldy, onyń barlyǵy mektep salýǵa baǵyttalady. Jospar boıynsha 100 myń oqýshyǵa arnalǵan 89 mektep salynady. Búginde 61 mektep paıdalanýǵa berildi, 74 myńnan astam oqýshy bilim alyp jatyr. Salynǵan mektepterdiń 29-y aýyldyq jerde ornalasqan. Bıyl 22 myń oqýshyǵa arnalǵan 28 mektep salý josparlanyp otyr, — dedi Sybaılas jemqorlyqqa qarsy is-qımyl agenttiginiń aǵa tergeýshisi Maqsat Imanǵazın baspasóz týry barysynda.
Sondaı-aq spıker atalǵan baǵyttaǵy jumys jalǵasatynyn aıtty.
— 2022 jyldan bastap sybaılas jemqorlyqqa qarsy qyzmet 1 trıllıon teńgeden astam qarajatty qaıtardy. Qarajatty qaıtarý — qylmystyq is aıasynda tergeý barysynda, sondaı-aq keltirilgen zalaldy erikti túrde óteý arqyly jáne sot sheshimi boıynsha múlikti tárkileý jolymen júzege asyrylady, — deıdi ol.
Aıta ketsek, búginde qaıtarylǵan aktıvter qarajaty esebinen 400-den astam áleýmettik nysan salynyp jatyr.