Jemqorlardan tárkilengen múlik xalyqqa qalaı taratylady
ASTANA. QazAqparat - QR Memlekettik qyzmet isteri jáne sybaılas jemqorlyqqa qarsy is-qımyl agenttigi jemqorlardan tárkilengen múlikti áleýmettik jaǵynan az qamtylǵandarǵa taratýdy usynyp otyr, dep xabarlaıdy QazAqparat tilshisi.
Agenttik tóraǵasynyń orynbasary Alık Shpekbaevtyń aıtýynsha, ondaı múlikti aldymen memleket menshigine aýdarý qajet. Artynan áleýmettik jaǵynan az qamtylǵan azamattarǵa taratýǵa bolady "Menińshe, ondaı múlikti aldymen sot sheshimi negizinde tárkilep, memleket menshigine aýdarý qajet. Sodan keıin taratýǵa bolady. Máselen, Qostanaıdyń burynǵy ákiminen (Axmetbek Axmedjanov - avt.) tárkilengen múlik memleket menshigine aýdaryldy. Artynan memlekettik múlik qurylymdary arqyly kezekte turǵandarǵa taratýǵa bolady. Menińshe, osy jumysqa qoǵam ókilderi de qatysýy qajet", - dedi Shpekbaev QazAqparat tilshisine bergen suxbatynda.
Aıta keteıik , búgin Astanada ótken xalyqaralyq konferentsııada Sybaılas jemqorlyqqa qarsy is-qımyl ulttyq bıýrosynyń jetekshisi Talǵat Tatýbaev jemqorlardyń múlkin taratýdyń jańa ádisi týraly aıtty. "Qazirgi kezde biz taǵy bir bastamany kóterip otyrmyz. Jemqorlardan tárkilengen aktıvterdi áleýmettik jaǵynan az qamtylǵandarǵa - balalar úıleri men kópbalaly otbasylarǵa taratyp berýge bolady. Atalǵan másele pysyqtalyp jatyr", - dedi ol.
