Jemqorlardan tárkilengen qarjyǵa 70-ten astam mektep salynady

ASTANA. QazAqparat – Bıyl elimizde sybaılas jemqorlyq isi boıynsha tárkilengen qarajatqa mektep salyna bastaıdy. Bul týraly Oqý-aǵartý mınıstri Ǵanı Beısembaev málim etti, dep habarlaıdy QazAqparat tilshisi.

«Jemqorlardan tárkilengen qarjyǵa bıyl elimizde 70-ten astam mektep salynady. Bizde mektep qujattary men tizimi bar. Jýyrda mektep qurylysyna qarjy bólinedi. Mektepter elimizdiń barlyq óńirinde salynady», - dedi Ǵanı Beısembaev Úkimet otyrysynan keıin BAQ ókilderiniń saýalyna jaýap bere turyp.

Mınıstrdiń naqtylaýynsha, jemqorlyqtan jınalǵan qarjy jańa mekteptermen qatar qurylysy bastalǵan mektepterge de jumsalady.

Eske salaıyq, Memleket basshysy byltyr 1 jeltoqsanda jarııalaǵan Joldaýynda: «Jemqorlardyń zańsyz tapqan qarjysy olar sottalǵan soń memleketke ótip, túgeldeı mektep qurylysyna jumsalýǵa tıis», - dep atap ótken bolatyn.

Joldaý jarııalanǵan bir aıdan astam ýaqyttan keıin Úkimet basshysy Álıhan Smaıylov «Bilim berý ınfraqurylymyn qoldaý qorynyń» esepshotyna 50 mlrd teńge túskenin málim etti.

Al bıyl qańtarda jemqorlardan tárkilengen 120 mlrd teńge bilim berýdi qoldaý qoryna tústi. Ol týraly Premer-Mınıstrdiń orynbasary – Qarjy mınıstri Erulan Jamaýbaev málimdegen edi.