Jemqorlardan qaıtarylǵan aqsha mektep qurylysyna qalaı jumsalady

ASTANA. QazAqparat – Oqý-aǵartý mınıstri Ashat Aımaǵambetov Úkimet kýlýarynda jemqorlardan alynǵan aqshanyń qalaı jumsalatyny týraly málimet berdi, dep habarlaıdy QazAqparat tilshisi.

«Jaıly mektep» jobasyna jumsalatyn 2,6 trln teńge jemqorlardan alynǵan qarajat esebinen bóline me?» dep surady BAQ ókili mınıstrden.

«Jaıly mektep» ulttyq jobasy týraly aıtsaq, oǵan bólinetin 2,6 trln teńge tolyǵymen respýblıkalyq bıýdjetten bólinip otyr. Munyń aldynda bizde mektep salýǵa qajetti qarajattyń bir bóligi respýblıkalyq bıýdjetten, bir bóligin jergilikti ákimder bóletin. Biraq, ózerińiz kórip otyrsyzdar, kópten beri bul másele sheshilmegen. Óıtkeni jergilikti bıýdjetten qarajat tolyq qarastyrylmaıtyn. Qazirgi ýaqytta bul máseleni bir degende tolyǵymen sheship tastaý úshin qarajat túgeldeı respýblıkalyq bıýdjetten qarastyryldy. Biraq buǵan qosa Memleket basshysynyń tapsyrmasy boıynsha tıisti qor qurylady», - dedi mınıstr.

Aıtýynsha, atalǵan qordyń aıasynda da jumys júrgizilmek.

«Ony biz qarap otyrmyz. Qazir erejeleri daıyndalyp jatyr. Kelesi jyldan bastap iske asyramyz dep daıyndyq jumysyn júrgizip otyrmyz. Bul qarajat ta atalǵan problemany tolyǵymen sheshýge baǵyttalady», - dedi Ashat Aımaǵambetov.