Kólik mınıstrligi jemqorlardan qaıtarylǵan qarajat qorynan 9,3 mlrd teńge surap otyr

ASTANA. KAZINFORM — Premer-mınıstr Oljas Bektenov Májilis depýtatynyń suraǵyna bergen jaýabynda Pavlodar qalasyndaǵy áýejaı qashan jóndelip bitetinin aıtty.

Úkimet basshysynyń málimetine qaraǵanda, Pavlodar áýejaıyna jasandy ushý-qoný jolaǵyn, rýldeý jolaǵyn salyp, perronyn rekonstrýktsııalaý úshin «Kyrylys Group RK» JShS-men 16,4 mlrd teńgeniń sharty jasalǵan. Osy shart aıasynda 2024 jyly Ulttyq qordan 4,8 mlrd teńge bólinip ıgerilse, bıyl 2 mlrd 258 mln teńge qarastyrylǵan. Onyń 627,4 mln teńgesine materıaldar men jabdyqtar satyp alynyp, 833,6 mln teńgesine qurylys-montajdaý jumystary jasalǵan. Taǵy 43,2 mln teńgege ınjınırıngtik qyzmetter júrgizilgen.

Qalǵan aqshaǵa perımetrdi qorshaý men beınebaqylaý júıesin ornatý jumystary júrgizilip jatyr.

— Merdiger tarapynan jumystyń qaldyq túrleri boıynsha aktilerge qol qoıylady (oryndaý jumystyń jalpy kóleminiń 44% quraıdy). Jobany aıaqtaý úshin 9,3 mlrd teńge mólsherinde qarajat bólý qajettiligi týyndap otyr. Kólik mınıstrligi Qarjy mınıstrligine Pavlodar qalasynyń áýejaıyn qaıta qurý jobasy úshin arnaýly memlekettik qordan qarajat bólý týraly usynystar engizdi. Jalpy jobany bıýdjet komıssııasy qoldap, 2026-2028 jyldarǵa arnalǵan respýblıkalyq bıýdjet esebinen qarjylandyrý týraly sheshim qabyldaǵan. Qurylys maýsymynyń aıaqtalýyn jáne óńirdiń klımattyq jaǵdaıyn eskere otyryp, jobany túpkilikti iske asyrý 2026 jylǵa josparlanǵan, — dep jazady Oljas Bektenov.

Buǵan deıin qaıtarylǵan aktıvterdiń 10 mıllıard teńgeden astamy Abaı oblysyna sý tartýǵa bólingenin jazǵan edik.