Jemqorlar jymqyrǵan qarjyǵa salynǵan mektep — fotoreportaj
ASTANA. KAZINFORM — Búgin elordada Sybaılas jemqorlyqqa qarsy is-qımyl agenttigi jýrnalısterge jemqorlardan tárkilengen qarjyǵa salynyp jatqan áleýmettik nysandardy kórsetti.
Astana qalasy № 97 mektep gımnazııasy dırektorynyń tárbıe jónindegi orynbasary Aıgúl Birjanovanyń sózinshe, bilim ordasy byltyr 8 qańtarda ashylǵan.
— Bizdiń mektep 2024 jyly 8 qańtarda paıdalanýǵa berildi. Bilim oshaǵy jemqorlardan tárkilengen qarjyǵa salyndy. Mektep qurylysyna shamamen 4 mlrd teńge qarjy bólindi. Qazir 2463 oqýshy eki aýysymda qazaq jáne orys tilinde bilim alyp jatyr. Mektep boıynsha 131 beınebaqylaý kamerasy qoıylǵan, onyń ishinde 24 beınebaqylaý kamerasy jedel áreket etý ortalyǵyna tikeleı qosylǵan. Sonymen qatar ár kabınette daýys qosylǵan beınebaqylaý kamerasy qoıyldy, — dedi Aıgúl Birjanova Antıkor uıymdastyrǵan baspasóz týry barysynda.
Onyń aıtýynsha, bul mekteptiń ereksheligi balalardy ulttyq qundylyq, ıaǵnı dástúrge baýlıdy. Sondaı-aq bilim oshaǵy zamanaýı talapqa saı keledi.
— Balalardy erte jastan ulttyq dástúrge baýlımyz. Oqýshylardy turǵylyqty mekenjaıy boıynsha qabyldaımyz, — deıdi ol.
Sondaı-aq BAQ ókilderi dırektor orynbasarynan oqýshylar mekteptiń jemqorlar jegen aqshaǵa salynǵanyn bile me dep surady.
— Árıne, oqýshylar da, ata-ana da biledi, — dep qysqa qaıyrdy Aıgúl Birjanova.
Buǵan deıin Antıkor ókili jemqorlardan tárkilengen 153,3 mlrd teńgege mektep salynatyny týraly málimdegen edi.