Jemqorlar óziniń otbasyna «qara daq» qaldyryp otyr - Shpekbaevtyń kómekshisi

ASTANA. QazAqparat - Sybaılas jemqorlyqqa barǵandardyń otbasy músheleri zardap shegedi. Bul týraly elorda ákimdiginde «Astana - adaldyq alańy» jobasy aıasynda sybaılas jemqorlyqpen kúres máselesine arnalǵan keńeste Memlekettik qyzmet isteri jáne sybaılas jemqorlyqqa qarsy is-qımyl jónindegi agenttik tóraǵasynyń kómekshisi Hakım Kúshqalıev málim etti, dep habarlaıdy QazAqparat.

«Máselen, bólim basshysy orynbasarynyń ne istep jatqanyn nemese basqarma basshysy qaramaǵyndaǵy qyzmetkerlerdiń teris áreketterin bilmeýi múmkin emes. Biz tek fakti boıynsha qarastyramyz. Qylmys oryn alsa, onda oǵan áreket etýge tıistimiz. Memlekettik mekeme men organdaǵy sybaılas jemqorlyq qylmysyn tótenshe jaǵdaı retinde baǵalaý kerek. Túrli dárejedegi basshylar baǵynyshty qyzmetkerlerdiń jemqorlyq quqyq buzýshylyqtar úshin jekeleı jaýapty bolady», - dep toqtaldy ol.

Hakım Kúshqalıevtiń sózine qaraǵanda, osy jyldan bastap aldyn alý sharalaryna ekpin qoıý maqsatynda jazalaý is-qımyldary tómendetilip keledi.

«Bul - sybaılas jemqorlyqpen kúres sharalary azaıyp jatqandy bildirmeıdi. Memleketke osy qylmystar úshin sottalǵandardy abaqtyda ustaý ekonomıkalyq turǵydan tıimdi emes. Atap aıtqanda, 400 myń, 50 myń, 10 myń somasynda para alyp ustalǵandar bar. Osy qylmystar úshin aıyptylar 5-7 jyl aralyǵynda bas bostandyǵynan aıyrylady. Alaıda sottalǵandardy ustaý memleket úshin qymbatqa túsedi. Jyl ishinde sottalǵan bir adamǵa memleket 1 mln teńgeden astam qarjy jumsaıdy. Negizi, bul qomaqty qarjy qoldaýdy qajet etetin áleýmettik jobalarǵa jumsalǵany durys bolar edi», - dedi ol.

H. Kúshqalıev memlekettik qyzmetshilerdiń zańsyz is-qımyldarynan týyndaıtyn keri saldarǵa toqtaldy.

«Jemqorlyq qylmysyna barǵan adamdardyń otbasy, bala-shaǵasy nege zardap shegýi kerek? Bul adamdar qylmys jasaý arqyly óziniń otbasyna «qara daq» qaldyryp otyr. Ol ózine ǵana emes, sonymen qatar balalarynyń bolashaǵyna zalalyn keltiredi. Sebebi memlekettik qyzmetke keler aldynda únemi ata-analary, olardyń málimetteri men sottylyǵy atap kórsetiledi», - dedi ol.