Jemqorlar «halyq jaýy» atanýy tıis - aýǵan ardagerleri
ASTANA. QazAqparat - «Qaharman urpaq» qoǵamdyq qorynyń prezıdenti, Aýǵanstan soǵysy ardagerleri qaýymdastyǵy tóraǵasynyń orynbasary Qaırat Elýbaev jemqorlarǵa qatysty ustanymdar qatań bolýy kerek dep esepteıdi.
«Ádiletsizdikke, ótirikke, jalqaýlyqqa, súreńsiz qylyqtar men áreketterge, ultshyldyqqa jáne násilshildikke tózimsizdik qasıetterin jas býynǵa úıretýimiz kerek. Jemqorlar men paraqorlarǵa qyrǵı-qabaq tanytýǵa shaqyramyz. Eger memlekettik sheneýnik para alyp jatqan jerinen ustalsa, jemqorlyǵy sotpen dáleldense, memlekettiń bedeline nuqsan keltirse, onda ony - halyq jaýy ataýymyz shart. Árbir adam ózine bergen mindetke jaýapkershilik tanytýy tıis. Jemqor - aqyl parasaty kem ári óz janyn satqan adam», - dedi ol búgin Ortalyq kommýnıkatsııalar qyzmetinde ótkizgen baspasóz máslıhatynda.
Onyń sózi boıynsha, patrıotızmniń negizi - Otanǵa degen súıispenshilik, kez kelgen ýaqytta oǵan janyn pıda etýge daıar bolý, ishki rýhanı jáne deneniń saýlyǵy.
«Jeke mádenıetińdi jáne bilimińdi shyńdaý arqyly, adaldyqqa, shyndyqqa, erlik pen batyldyqqa talpyný, árdaıym bilim aǵartý - patrıottyq sezimderdiń páktigi men keńdigin túısinýge bolady, Otan úshin jasap jatqan isterińniń mańyzdylyǵyn uǵynasyń», - dep atap ótti ol.
