Jemqor sheneýnikterdiń ornyna JI paıdalaný múmkin be – Tsıfrmın jaýaby

ASTANA. KAZINFORM – Májilis depýtaty Baqytjan Bazarbek memlekettik qyzmetkerler arasyndaǵy sybaılas jemqorlyqty azaıtý úshin sheneýnikterdiń ornyna jasandy ıntellektini paıdalanýdy usynǵan bolatyn. Tsıfrlyq damý, ınnovatsııalar jáne aeroǵarysh mınıstrligi Jasandy ıntellekt jáne ınnovatsııalardy damytý komıteti tóraǵasynyń orynbasary Álibek Saılanbaev osy usynysqa jaýap berdi.

- Shynymen jasandy ıntellekt kóptegen jumysty oryndap, adamdardyń jumys ornyn azaıtyp jatqany týraly derekter bar. Biraq bizdiń oıymyzsha, JI eshbir adamdy almastyrmaıdy. «JI adamdy almastyrmaıdy, JI-di qoldana alatyn adam qoldana almaıtyn adamdy almastyrady» degen áıgili sóz bar. Bul qural ǵana. Eń birinshi adamdarǵa JI-di úıretýimiz kerek. Meniń oıymsha, memlekettik qyzmetkerlerdi osy quraldarǵa úıretkennen keıin olardyń eńbek ónimdiligi men tıimdiligi artý kerek, - dedi ol BAQ ókiliniń suraǵyna bergen jaýabynda.

Sondaı-aq ol 5-10 jyldyń ishinde adam istegen jumystyń kóbin avtonomdy túrde oryndaı beretin JI paıda bolýy múmkin.

- Áıgili mamandardyń aıtýynsha, 5-10 jyldyń ishinde AGI quraly shyǵady degen jospar bar. Qazir JI avtonomdy túrde bireýdi almastyra almaıdy. Biraq 5-10 jylda adamdy almastyra alatyn deńgeıge jetedi dep oılaımyn, - dedi Álibek Saılanbaev.

Ótken aptada ChatGPT endi ınternet-dúkennen taýar satyp alyp, PowerPoint prezentatsııalaryn jasaıtyn fýnktsııasyn iske qosqany málim boldy.