Jemis-jıdek pen kókónisti qalaı jýý kerek - Bas sanıtardyń keńesi
Qoǵamdyq densaýlyqty saqtaý komıtetiniń tóraǵasy Jandarbek Bekshınniń aıtýynsha, ınfektsııalar, kóbinese, et, jumyrtqa, sút ónimderi, salattar, kremdi-kondıterlik ónimder sııaqty taǵamdarda tez taralady.
«Sondyqtan ondaı tamaqty bólme temperatýrasynda bir saǵattan asyrmaı saqtaý qajet. Al tońazytqyshta saqtaý merzimi - 6-12 saǵat. Daıyn tamaqty dastarhanǵa qoıardyń aldynda jaqsylap turyp qaınatyp alǵan durys. Salattardy azdap isteý kerek. Qansha jeısiz, sonsha isteý kerek. Negizi, eń qaýipti taǵamdar ol - maıonez nemese qaımaq qosylǵan salattar. Sebebi dál sondaı taǵamda mıkroaǵzalar tez taraıdy. Sosyn kremdi-kondıtrlik ónimder de qaýipti. Ásirese, jumyrtqadan jasalǵan kremder tez búlinedi. Budan bólek, qus ónimderi de bar» - dedi J.Bekshın Astanada ótken baspasóz máslıxatynda.
Bas sanıtarlyq dáriger jemis-jıdek pen kókónisterdiń qaýipsizdigine de toqtaldy.
Onyń aıtýynsha, qulpynaı, júzim, sary órik, qara órik, shıe sııaqty jemis-jıdekte ınfektsııa kóp bolady.
«Ony jýý qıyn. Oǵan qosa, tazartý kerek. Sondyqtan dál osy jemis-jıdekti jaqsylap turyp jýý qajet. Aldymen ystyq sýǵa salǵan durys. Sosyn salqyn sýmen shaıý kerek. Budan bólek, as sodasyn sýmen aralastyryp, arnaıy eritindi jasaýǵa bolady. Soǵan jemis-jıdek pen kókónisti 2-3 saǵatqa salsa, zeń, grıbok sııaqty qaýipti zattar ketedi. Negizi, bul - jaqsy dezınfektsııa. Sodamen jýǵannan keıin sýmen shaıý kerek. Sonda balalarǵa qoryqpaı berýge bolady», - dep atap kórsetti J.Bekshın.
Aıta keteıik, J.Bekshın jaz kezinde toı taǵamdaryn daıyndaý qaýipsizdigine de toqtaldy. Onyń aıtýynsha, aldymen aspazshylardyń kásibı daıyndyǵyn tekserip alý qajet. Bas aspazshyda sanıtarlyq kitapsha bolýy tıis. Syrttan adam tartýǵa bolmaıdy. Ydys-aıaqty jýyp turatyn adamdardyń sany da jetkilikti bolýy shart.
«Sosyn tamaqty saqtaıtyn arnaıy qural-jabdyqtardyń bar-joǵyn tekserip alǵan jón. Daıyn turǵan tamaq tońazytqyshta saqtalýy qajet. Meıramxanada ystyq sý bolýy tıis. Tazalyqqa basa mán berý kerek. Negizi, tamaq jasaıtyn jerdiń sanıtarlyq jaǵdaıy jappaı ýlanýǵa sebep bolyp jatady. Toıdyń dastarqanyn bir saǵat buryn jasaǵan durys. Odan erte jaıylsa, daıyn tamaqta mıkroaǵzalar tez ósedi. Sodan adam ýlanady. Árıne, tamaq ónimderiniń saqtaý merzimin únemi baqylap otyrý qajet», - dep atap kórsetti J.Bekshın.
Budan bólek, Bas sanıtarlyq dáriger toıda jappaı ýlanýdyń basty sebebin atady.