Jemis aǵashynyń bakterııalyq kúıigimen kúres: Jańa preparattar synalyp jatyr
NUR-SULTAN. QazAqparat – Jemis aǵashtarynyń bakterııalyq kúıigimen kúres baǵytynda preparattardyń jańa túrleri synaqtan ótkizilip jatyr. Bul týraly Úkimet basshysynyń orynbasary Roman Sklıar, aıtty, dep habarlaıdy QazAqparat tilshisi.
«2021 jyly da óńdeý jumystary josparlanǵan jalpy aýdany 776,6 gektar baqta respýblıkalyq bıýdjet esebinen tıisti preparattarmen óńdeý jumystary júrgiziletin bolady. Qazirgi kezde, jemis aǵashtarynyń bakterııalyq kúıigi aýrýlaryna qarsy hımııalyq ýly preparattardy qoldanýdyń ekologııaǵa, tutynýshylardyń densaýlyqtaryna tıgizetin orasan zor áserin eskere otyryp, aldaǵy ýaqytta bıologııalyq preparattardy keń kólemde qoldanýǵa kóshý úshin olardyń jańa túrlerin synaqtan ótkizý jáne óndiriske engizý jumystary júrgizilýde», - delingen Úkimet basshysy orynbasarynyń senatorlar saýalyna bergen jaýabynda .
Aıta keteıik, 2020 jylǵy anyqtaý jumysynyń qorytyndysy boıynsha jemis aǵashtarynyń bakterııalyq kúıigi taralǵan aýdan 776,6 gektardy (Almaty oblysynda – 731,2 ga, Jambyl oblysynda – 35 ga, Túrkistan oblysynda – 0,5 ga, Almaty qalasynda – 9,9 ga) qurap otyr.
Elimizde jemis aǵashynyń bakterııalyq kúıigi taralǵan baqtarda óńdeý jumysyn respýblıkalyq bıýdjet esebinen «Fıtosanıtarııa» RMK júrgizedi.
Aıta keteıik, senator Sultan Dúısembınov Úkimet basshysynynyń orynbasarlary Eraly Toǵjanov pen Roman Sklıarǵa joldaǵan saýalynda qazaqstandyq baý-baqshaǵa, ulttyq maqtanyshymyz bolyp sanalatyn «almatylyq aportqa» erekshe qaýip tóndirip otyrǵan bakterııalyq kúıik qateri týraly dabyl qaqty.
