Jem-shóppen qamtamasyz etýdi qazirden qolǵa alý kerek - Álıhan Smaıylov

ASTANA. QazAqparat – Úkimet basshysy Álıhan Smaıylov kóktemgi egis jumystaryna qatysty tıisti mınıstrlikterge birqatar mindet júktedi, dep habarlaıdy QazAqparat tilshisi.

«Birinshiden, Aýyl sharýashylyǵy mınıstrligi Indýstrııa jáne Qarjy mınıstrligimen birlesip, fıtosanıtarııalyq is-sharalar júrgizýdi qamtamasyz etsin. Sonymen qatar, tyńaıtqysh sebý jumysy boıynsha sharalar qabyldasyn. Ekinshiden, Ekologııa mınıstrligi Aýyl sharýashylyǵy mınıstrligi jáne ákimdiktermen birlesip, ońtústik óńirlerde sýarmaly egistikti sýmen turaqty qamtamasyz etý jóninde sharalar qabyldasyn», - dedi Álıhan Smaıylov Úkimet otyrysynda.

Sondaı-aq, Premer-Mınıstr egistik jumystaryna daıyndyqqa kóktemdi kútip otyrmaı búginnen kirisý kerektigin eskertti.

«Úshinshiden, Aýyl sharýashylyǵy mınıstrligi oblys ákimdikterimen birlesip, mal sharýashylyǵyn jem-shóppen qamtamasyz etýdi qazirden qolǵa alý kerek», - dedi ol.

Buǵan deıin Úkimet basshysy tyńaıtqyshtyń jetkilikti sebilmeýinen dıhandardyń 10 mln tonna bıdaıdan aırylǵaly otyrǵanyn aıtqan edi.

Odan bólek, Úkimet otyrysynda bıyl kóktemgi egis jumystaryna 140 mlrd teńge bólinetini aıtyldy.