Jem-shóp daqyldarynyń úlesin ǵylymı negizdelgen normaǵa jetkizý kerek - depýtat
NUR-SULTAN. QazAqparat - Aldaǵy jyldary mal azyǵyn arttyrýǵa erekshe nazar aýdarý kerek bolyp tur. Bul týraly Parlament Májilisinde et jáne sút ónimderin óndirýdi, eksporttaýdy damytý taqyrybyndaǵy parlamenttik tyńdaýda palata depýtaty Berik Ospanov málim etti, dep habarlaıdy QazAqparat tilshisi.
«Memleket salanyń strategııalyq mańyzdylyǵyn túsingendikten, mal sharýashylyǵy taýaryn óndirýshilerdi memlekettik qoldaý kólemin jyl saıyn ulǵaıtýda. Máselen, sońǵy bes jylda sýbsıdııalar kólemi 2 ese ósti. Biraq qol jetkizilgen oń nátıjelerge qaramastan, aýyl sharýashylyǵy eldiń jalpy ishki óniminiń shamamen nebári 4,3 paıyzyn óndiredi. Elbasy da osy máselege birneshe ret nazar aýdarǵan bolatyn jáne 2018 jylǵy 5 qazandaǵy Qazaqstan halqyna Joldaýynda «eńbek ónimdiligin jáne qaıta óńdelgen aýyl sharýashylyǵy óniminiń eksportyn 2022 jylǵa qaraı 2,5 ese kóbeıtýdi» tapsyrdy. Bul rette, bizdiń oıymyzsha, basa mán berýdi qajet etetin birqatar eleýli problemalar bar», - dedi Májilistiń Agrarlyq máseleler komıtetiniń tóraǵasy B. Ospanov.
Osy oraıda ol maz azyǵy máselesine toqtala kele, búgingi tańda shartty túrde bir mal basyna nebári 10 tsentner azyq birligi óndirilip jatqanyn, bul qajetti zootehnıkalyq normadan tómen ekenin atap ótti.
«Egis alańdary qurylymynda jem-shóp daqyldarynyń úles salmaǵy ǵylymı negizdelgen 30 paıyzdyń ornyna 16 paıyzdy ǵana quraıdy. Onyń ústine olardyń ónimdiligi de tómen jáne ósiriletin jem-shóp daqyldarynyń jıyny shekteýli. Jem-shóp óndirisinde negizinen ónimdiligi az tabıǵı shabyndyqtarǵa mán berilgen», - dep túsindirdi depýtat.
Ǵalymdardyń derekteri boıynsha, qajetti jem-shóp bazasyn qurý esebinen jáne janýarlardy tolyqqandy azyqtandyrý arqyly qolda bar mal basynyń ónimdiligin shamamen 2 esege arttyrýǵa bolady.
«Osyǵan baılanysty jemshóp bazasyn qurý baǵytyna toqtalsaq, egis alqaptardyń qurylymynda jem-shóp daqyldarynyń úles salmaǵyn ǵylymı negizdelgen normaǵa jetkizý, ıaǵnı shamamen 2 ese ulǵaıtý qajet. Ekinshiden, jem-shóp daqyldarynyń tuqym sharýashylyǵyn damytý kerek. Úshinshiden, jyl saıynǵy óndiris kólemin talap etiletin tutyný normalaryna deıin jetkizip, qurama jem ónerkásibin damytý qajet», - dedi B. Ospanov.
Budan bólek ol qus ósirýshiler úshin qoljetimdi baǵa boıynsha 600 myń tonna kóleminde astyqtyń jemdik qoryn qurý máselesin qaraý kerek ekenin, ol boıynsha qajettilikterdi Azyq-túlik korporatsııasy óteı alatynyn jetkizdi.
