Jem ózenimen Jylyoı aýdanynyń aýmaǵyna kelip jatqan sýdyń aǵysy qatty
ATYRAÝ. KAZINFORM – Jem ózenimen Atyraý oblysyndaǵy Jylyoı aýdanynyń aýmaǵyna sý kele bastady. Sýdyń qatty aǵysy ózenniń jaǵalaýyndaǵy topyraqty qulatyp jatyr.
Jem ózeni Jylyoı aýdanyndaǵy Aqkıiztoǵaı, Shoqpartoǵaı, Turǵyzba aýyldary men Qulsary qalasynyń mańymen aǵyp ótedi. Qazir ózenniń atalǵan aýdan aýmaǵyna kelip jatqan sýdyń aǵysy qatty.
Atyraý oblysy ákiminiń oblysy ákiminiń orynbasary Qaırat Nurtaevtyń aıtýynsha, búgin, 27 naýryzda Aqkıiztoǵaı aýylynyń mańynda sý deńgeıi 2 metr 73 sm-ge jetken. Bir táýlikte ózen arnasy 13 sm-ge kóterilgen.
– Byltyr Jem ózenindegi sý deńgeıi 3 metr 63 sm-ge kóterilgen edi. Atalǵan sý aıdynyndaǵy qaýipti deńgeı – 3 metr 40 sm. Ázirge ózendegi sý qaýipti deńgeıge jete qoıǵan joq. Biraq túngi mezgilde aǵys qatty bolady. Sol sebepten, Jem ózeniniń 6 ýchaskesinde baqylaý ornatyldy, - deıdi Qaırat Nurtaev.
Ákim orynbasarynyń aıtýynsha, kúndiz de, túnde de ózen jaǵalaýyna bóget salynyp jatyr. Oǵan tótenshe jaǵdaılar salasynan 100, Qorǵanys mınıstrliginen 150 adam tartylǵan.
– Jem ózeniniń Jylyoı aýdanyndaǵy arnasy Aqkıiztoǵaı aýyldyq okrýginiń aýmaǵynan bastaý alady. Al Aqkıiztoǵaı aýylynyń tusynda sý deńgeıi áli kóterilip jatyr. Demek, qaýip áli seıilgen joq. Sondyqtan, Turǵyzba aýylynyń tusyn tereńdetý, Kaspıı teńizine baratyn arnasyn arshylyp jatyr, -dedi Qaırat Nurtaev.
Al oblystyq qurylys basqarmasynyń basshysy Nurbergen Qusaıynovtyń málimetinshe, byltyrǵy tamyz aıynda Jem ózeni men Qursaı kanalynyń, Qamyskól jáne Solenoe kóliniń túbin tereńdetý, bóget salý bastalǵan.
– Sý aıdyndarynyń túbin tereńdetý jumysynyń bas merdigeri retinde «SAP-IN-VEST» JShS tańdaldy. Bul jumysty bıylǵy qarashada aıaqtaý josparlanyp otyr. Osy kezge deıin Jem ózeniniń 50 shaqyrym arnasy tolyǵymen tereńdetildi. Al Qursaı kanalynyń 46,1 shaqyrymyn tereńdetý kózdeldi. Qazir onyń 80 paıyzy oryndaldy, - dep málim etti Nurbergen Qusaıynov.
Eske sala ketelik, budan buryn Qulsaryǵa Atyraý men Mańǵystaýdan kómek kelgenin jazǵan edik.