Jeltoqsannyń 12-si kúni Qazaqstannyń avtojoldarynda 13 adam mert bolyp, 6 adam zardap shekti - TJM
ASTANA. Jeltoqsannyń 14-i. QazAqparat - Ótken senbi kúni respýblıkanyń avtojoldarynda oryn alǵan 5 jol-kólik oqıǵasynda 13 adam qurban bolyp,
taǵy 6 adam túrli dene jaraqattaryn aldy, dep habarlaıdy QazAqparat QR Tótenshe jaǵdaılar mınıstrligine silteme jasap.
Іri apat Almaty oblysy «Úlken Almaty arnasy» avtojolynyń 37-shi shaqyrymynda «Aýdı» jáne «KamAZ» júk kóliginiń qatysýymen boldy. Onyń saldarynan jeńil avtokóliktiń 27 jastaǵy júrgizýshisi men onyń barlyq úsh jolaýshysy oqıǵa ornynda qaza tapty.
Atyraý oblysynda, «Kúlsary-Atyraý» avtojolynyń 165-shi shaqyrymynda 22 saǵat 30 mınýtta «VAZ» jáne «Nıva» avtokólikteri soqtyǵysyp qaldy. Birinshi kóliktiń júrgizýshisi men onyń eki jolaýshysy jáne «Nıva» kóliginiń taǵy bir jolaýshysy oqıǵa ornynda jantásilim etti. «Nıvanyń» júrgizýshisi túrli jaraqattarmen aýrýhanaǵa jetkizildi.
Sondaı-aq osy kúni Ońtústik Qazaqstan oblysy Sholaqqorǵan aýylynyń Jibek joly kóshesinde «Mıttsýbısı» jeńil kóligi men «Tıan-Shan» júk kóliginiń soqtyǵysýynan jeńil mashınaǵa mingen 23 jáne 29 jastaǵy eki jolaýshy oqıǵa ornynda kóz jumsa, onyń 26 jastaǵy júrgizýshisi aýrýhanaǵa jetkizildi.
