Jeltoqsannyń ekinshi onkúndiginde 150 kg túrli esirtkiler tárkilendi

ІІM esirtki qylmysyna qarsy is-qımyl departamentiniń qyzmetkerleri aýmaqtyq bólinistermen birlesip, jeltoqsan aıynyń ekinshi onkúndiginde esirtkiniń iri partııalaryn tárkileı otyryp, birqatar qylmyskerdi ustady, – dep habarlaıdy Polisia.kz saıty.

Jambyl oblysynda Shý qalasynyń turǵyny ustaldy. Onyń mal qorasynan jalpy salmaǵy 111 kg marıhýana jáne 3 kg gashısh salynǵan polıpropılen qaptary, sondaı-aq tirkelmegen 12 kalıbrli ańshy myltyǵy tabyldy.

Kúdikti esirtkini Almaty qalasynda satpaq bolǵan.

Almaty oblysynyń Pokrovka kentinde 37 jastaǵy áıel ustalyp, odan 61 gramm mefedron tárkilendi.

Elordalyq polıtseıler jergilikti turǵynnan jalpy salmaǵy 153 gramm bolatyn mefedron tárkiledi.

Aqtaýda buryn sottalǵan qala turǵynynan jeke tintý kezinde jáne jalǵa alynǵan páterin tekserý kezinde 225 gramm psıhotroptyq sıntetıkalyq zattar tabylyp, tárkilendi.

Petropavlda qala turǵyny quryqtalyp, odan jeke tintý kezinde jáne jalǵa alynǵan páterin tekserý kezinde 351 gramm “alfa-PVP” sıntetıkalyq zaty anyqtaldy.

Atyraý kósheleriniń birinde jergilikti turǵyn ustaldy. Kúdiktini jeke tekserý kezinde jáne páterin tintý kezinde polıtsııa qyzmetkerleri “alfa-PVP” sıntetıkalyq zatyn tapty. Esirtkiniń salmaǵy 115 gramdy qurady.

– Jeltoqsannyń ekinshi onkúndiginde ІІM esirtki qylmysyna qarsy is-qımyl bólinisteriniń qyzmetkerleri zańsyz aınalymnan 150 kg-nan astam túrli esirtki zattaryn tárkiledi. ІІM esirtki quraldaryn, psıhotroptyq zattardy, olardyń analogtaryn ótkizý maqsatynda zańsyz daıyndaǵany, satyp alǵany, saqtaǵany jáne tasymaldaǵany úshin múlki tárkilenip, 5 jyldan 20 jylǵa deıin bas bostandyǵynan aıyrý jazasy qarastyrylatynyn eskertedi, – dedi QR ІІM esirtki qylmysyna qarsy is-qımyl departamenti bastyǵynyń orynbasary Sarqytbaı Qusaıynov.