Jeltoqsanǵa belgilengen Golovkın - Sonders jekpe-jeginiń óter-ótpesi kelesi aptada sheshiledi

ASTANA. QazAqparat - Brıtan boksshysy Bıllı Djo Sonderstiń (25-0, 12 KO) promoýteri Frenk Ýorren qazaqstandyq Gennadıı Golovkınmen (37-0-1, 33 KO) ótetin jekpe-jek týraly pikir bildirdi, dep habarlaıdy Sports.kz. 

«Golovkın - Alvares aıqasyndaǵy kúdikti teń nátıje Sonderske qalaı áser etetini - basqa másele. Ne de bolsa ol jeltoqsanda aıqas ótkizedi. Qarsylasy Golovkın bolǵany jaqsy edi. Biz bul aıqasty uıymdastyra alamyz degen úmittemin. Qolymyzdan kele me, joq pa, kelesi aptada kóremiz. Sáti túspese, basqa múmkindikterdi qarastyramyz. Bıllı judyryqtasýy tıis. Onyń beldigi bar, óz mansaby bar. Biraq olardyń biri [Golovkın nemese Alvares] onymen kezdesetini anyq. Bastysy, Bıllı kelesi aptada Sheffıldtegi jattyǵýlarǵa qaıtyp, jeltoqsandaǵy aıqasqa daıyndalady. Ol salmaǵyn baqylaýy tıis, sońǵy kezdesýde [Kishi Monroǵa qarsy] ol óte aýyr boldy», - dep jazdy Ýorren.

Eske sala keteıik, Alvareske qarsy kezdesýde Golovkın barlyq beldikterin qorǵap qaldy. Oǵan áli de bolsa dıvızıonnyń absolıýttik chempıony bolýy úshin WBO tıtýly jetpeı tur. Sonymen qatar taraptar 2018 jyldyń mamyrynda ótýi múmkin revansh jaıynda da kelissózder júrgizýde.