Jeltoqsanda jolaýshy tasymaldaýǵa búkil temirjol parki jumyldyrylady - QTJ
ASTANA. QazAqparat - Meıram kúnderi jolaýshy tasymaldaý isi qalaı júrip jatyr? Bul jóninde «Jolaýshy tasymaly» AQ ókilderi aıtyp berdi, dep habarlaıdy QazAqparat tilshisi.
«Jeltoqsandaǵy meıramdardy eskere otyryp, qosymsha 250 vagon relske shyǵaryldy. Bul vagondar 50 myń jolaýshyny tasymaldaýǵa arnalǵan. Qabyldanǵan sharalardyń nátıjesinde jolaýshy tasymaldaýǵa temirjol parki 100 paıyz jumyldyryldy deýge bolady. Suranysqa baılanysty ártúrli baǵyttardy qamtýǵa tyrystyq. Degenmen, vagon jetispeýshiligi týyndaıtyn kezder bolatynyn moıyndaımyz», - deıdi «Jolaýshylar tasymaly» AQ klıenttermen jáne BAQ-pen jumys jónindegi baǵytynyń jetekshisi Danııar Aıdarhanov.
Onyń sózine qaraǵanda, temirjol kóligin 10 mıllıonǵa jýyq qazaqstandyq paıdalanady. Adamdar kóliktiń osy túrin kóbine meıram kúnderi jáne jaz kezinde tańdaıdy.
«Qosymsha vagondardy satyp alýdyń reti bolmaı tur, sebebi olar jaı kúnderi bosqa qańtarylyp turady. Sáıkesinshe, olardy kútip ustaýǵa qosymsha qarjy qajet bolady», - dep túsindirdi D. Aıdarhanov.
Aıta keteıik, meıram kúnderi áleýmettik jelide vagondarǵa adam syımaı, qıyndyqtar týyndaǵany jaıly shaǵymdar jıi kezdesedi.
