Jeltoqsanda shyǵarylǵan Ulybrıtanııanyń ushaq tasyǵysh kemesine sý kirip jatyr
ASTANA. QazAqparat - Quny 3,1 mlrd fýnt sterlıng turatyn jańa brıtandyq alyp ushaq tasyǵysh kemesi saltanatty túrde sýǵa túsirilgenine eki apta ótkennen keıin, ishine sý kire bastaǵan, dep habarlaıdy The Sun basylymy.
HMS Queen Elizabeth bortyna ebelek biliginiń (vınt, val) tyǵyzdaýyshyndaǵy aqaýǵa baılanysty saǵatyna 200 lıtr teńiz sýy kirip jatyr. The Sun deregi boıynsha, uzyndyǵy 284 metr jáne syıymdylyǵy 70 myń tonna bolatyn keme qurǵaq dokqa jóndeýge qaıtyp oralady. Jóndeý jumystaryna birneshe mıllıon fýnt kerek.
Áskerıler tekserýdi bastady. Olar osy nusqamen jasalǵan «Ýelskıı hanzadasy» ushaq tasyǵyshynda osyndaı máseleniń bar-joǵyn anyqtap jatyr.
Qazirgi tańda «Elızaveta patshaıymnyń» sý sorǵyshtary bortqa kirip jatqan sýdy aıdap shyǵýǵa úlgeredi. Sondyqtan, ushaq tasyǵysh Portsmýtta teńiz synaqtaryn jalǵastyra alady.
«Biliktiń tyǵyzdaýyshyna baılanysty kemshilik «Elızaveta patshaıym» ushaq tasyǵyshyn synaqtan ótkizý kezinde anyqtaldy. Ony jóndeý jumystary barysynda aqaýdy túzetýge bolady. Biraq keme ázirge Portsmýtqa jaqyn jerde tur», - dep málim etti Koroldiktiń áskerı-teńiz floty.
HMS R08 - brıtandyq flot úshin jasalǵan eki ushaq tasyǵyshtyń bas kemesi sanalady. Oǵan Anglııanyń patshaıymy I Elızavetanyń (1558-1603) aty berilgen.
