Jeltoqsanda qazaqstandyqtar BJZQ-dan radıohırýrgııalyq em alýǵa 5,6 mlrd teńge jumsady
ASTANA. KAZINFORM — Ótken jyldyń jeltoqsan aıynda el turǵyndary radıohırýrgııalyq em alý úshin Biryńǵaı jınaqtaýshy zeınetaqy qorynan 5,6 mlrd teńge qarajattaryn aldy. Bul týraly Derekterdi óńdeý ortalyǵynan habarlady.
— 2025 jyldyń jeltoqsan aıynda radıohırýrgııalyq emdeý ádisterine tólem taǵaıyndaýmen birjolǵy zeınetaqy tólemderi boıynsha 7 154 ótinish qaraldy. Sóz sáýlelik terapııanyń gamma-pyshaq jáne kıberpyshaq sııaqty ádisteri (olar arqyly mysaly, isik aýrýlary bar naýqastarǵa operatsııa jasalady) jaıynda bolyp otyr. Oryndalǵan ótinimderdiń jalpy somasy shamamen 5,6 mlrd teńge. Bir aıdyń kórsetkishi baǵdarlama qolǵa alynǵan ýaqyttan bergi barlyq nátıjeden aıtarlyqtaı joǵary: 1 jeltoqsanǵa deıin bul sanat boıynsha jalpy nátıje 548 mln teńge somasyna iske asyrylǵan 507 ótinim boldy. Syrtqy belsendilik kúrt emes, biraq kezeń-kezeńmen arta bastady: 236 ótinish 204 mıllıon teńgege oryndaldy, al 2025 jyly ortasha aılyq kórsetkish buryn-sońdy 10 deńgeıine jetpeıtin, — delingen atalǵan ortalyqtyń Telegram paraqshasynda jarııalanǵan aqparatta.
Ortalyqtyń málimetinshe, el turǵyndary buǵan deıin stomatologııalyq qyzmetter úshin zeınetaqy qorynan qarajattaryn kóptep sheship aldy.
Alaıda, bul salada alaıaqtyq belgileriniń baıqalýyna oraı ótken jyldyń qyrkúıek aıynda oǵan tyıym salyndy. Qarashada plastıkalyq otaǵa qordan aqsha alý kúrt artyp, bul qyzmet túri úshin de BJZQ-dan aqsha alýǵa tyıym engizildi.
Al qazirgi ýaqytta el turǵyndary zeınetaqy qorynan joǵaryda atalǵan radıohırýrgııadan bólek orfandyq aýrýlarǵa, radıonýklıdtik jáne radıoıodtyq, protondyq emdeýge ǵana qarajattaryn ala alady.
Buǵan deıin 2025 jyly el turǵyndary baspanalaryn jaqsartý úshin zeınetaqy qorynan qansha qarajat alǵanyn jazǵan edik.