Jeltoqsanda «Astana» HQO táýelsiz sotynyń quramy jarııalanady
ASTANA. QazAqparat - 2017 jyldyń jeltoqsan aıynda «Astana» Halyqaralyq qarjy ortalyǵy táýelsiz sotynyń quramy belgili bolady. Atalǵan ortalyqtyń basqarýshysy Qaırat Kelimbetov qaı elden sýdıalar shaqyrylatynyn, sonymen birge elimizdegi qandaı ýnıversıtetterden kadrlar daıarlanatynyn aıtyp berdi, dep habarlaıdy «QazAqparat» HAA tilshisi.
«Biz «100 naqty qadam» boıynsha bes ınstıtýtsıonaldyq baǵdarlamanyń bóligi bolyp eseptelemiz. Atap aıtqanda, 71-shi qadamda aǵylshyn quqyqty bazada sheteldik sýdıalardy tartý arqyly táýelsiz sot qurý týraly aıtylady. Ózderińiz túsinetindeı, aǵylshyn quqyǵy boıynsha sýdıalarmen jumys júrgizý úshin 20-30 jyldaı tájirıbe kerek. Mundaı adamdardy Qazaqstanda birden tabý óte qıyn. Sondyqtan, alǵashqy 5-10 jylda biz belsendi túrde London, Gonkong, Sıngapýr, Dýbaı, Abý-Dabı, Katar, AQSh syndy elderden sýdıalardy tartamyz», - deıdi Qaırat Kelimbetov.
Onyń aıtýynsha, atalǵan baǵytta jumys bastalyp ketken.
«Halyqaralyq tusaýkeser kezinde biz qarjy ortalyǵynyń táýelsiz sotynyń quramyn jarııa etemiz degen oıdamyn. Ekinshi jaǵynan, biz Taıaý Shyǵystaǵy elderdiń tájirıbesinen góri jergilikti kadrlarǵa basa mańyz berýdi oılap otyrmyz. Demek, «Bolashaq» sekildi baǵdarlamalarmen oqyp kelgen nemese Nazarbaev ýnıversıtetin bitirgen bizdiń daryndy jastarymyzǵa ıek artqanymyz durys», - deıdi ol.
Qaırat Kelimbetov kadrlardyń daıarlyqtan ótetinin, sodan keıin olar bizdiń eldegi nemese álemdegi jetekshi ınvestıtsııalyq ınstıtýttardan tájirıbeden ótedi. Sonymen birge, ortalyq basqarýshysy nelikten aǵylshyn quqyqty júıe engizilip jatqany týraly aıtyp ótti.
«Aǵylshyn quqyqty júıe ne úshin tańdalǵanyn surap jatady. Álemdik qarjy ortalyǵynyń 90 protsenti osy júıe boıynsha jumys júrgizedi. Siz sol ortalyqtardyń tizimin kórińiz. Nıý-Iork, London, Sıngapýr, Gonkong sekildi negizgi qarjy ortalyqtary aǵylshyn quqyqty júıe boıynsha jumys atqarady», - dep túıdi sózin Qaırat Kelimbetov.
