Jeltoqsan oqıǵasynyń resmı qujattary kitap bolyp shyqty
Jeltoqsan oqıǵasyna bıyl 35 jyl tolyp otyr. Osyǵan oraı, Táýelsizdiktiń 30 jyldyǵy aıasynda QR Parlamenti Májilisiniń depýtaty, «Qazaq tili» qoǵamynyń prezıdenti Berik Ábdiǵalıulynyń bastamasymen arhıv qujattaryna negizdelgen derekti jylnama jaryq kórdi. Kitaptyń tusaýkeserine Májilis depýtattary, tarıhshylar men qoǵam qaıretkerleri qatysty.
«Bizdiń býyn Táýelsizdik alǵan kezde 20 jasta edik. ıAǵnı 1986 jyly Jeltoqsan bolyp jatqanda biz 15-tegi bala boldyq. Solardyń arqasynda jigerlenip, rýhtanyp óstik. Sondyqtan Jeltoqsan qaharmandary biz úshin árdaıym batyr. Árıne, taǵdyry ár túrli boldy. Ózderi de sezedi qurban bolǵanyn. Qazir maqtan tutyp júrgen azattyǵymyz da, sol azattyqpen birge kelgen jetistikterimiz de solardyń arqasynda ornady. Biz olarǵa jalpyulttyq laıyqty saıası baǵasyn bere almaı jatyrmyz. Aramyzda júrgen tiri batyrlar ǵoı bular. Qarapaıym stýdent qyz-jigitter jastyq jigerdiń, ulttyq namystyń qandaı bolý kerektigin bárimizge kórsetip ketti. Sondyqtan Táýelsizdik toılarynda eń birinshi qurmet solarǵa kórsetilýi kerek. Ekinshiden, bul taqyryptyń ózi áli zerttelgen joq. Kitap shyǵarǵandaǵy maqsatymyz osyny ǵalymdar zerttese eken degen nıet edi. Kitaptyń ishinde qanshama tizim bar. Solardyń báriniń taǵdyryn anyqtasa tarıh degenińiz sol», - dedi bastama avtory Berik Ábdiǵalıuly.
Qundy jınaqtyń baspa shyǵyndaryna «Altyn qyran» qoǵamdyq qory demeýshilik etken. 1000 danamen shyqqan jınaq Jeltoqsan taqyrybyn zerttep júrgen ǵalymdar men kitaphanalarǵa taratylmaq. Qordyń atqarýshy dırektory Maqsutbek Aıtmaǵanbet qajettilik týyndap jatsa, jınaqty qaıta basyp shyǵarýǵa daıyn ekenderin aıtady.
«Altyn qyran» qoǵamdyq qory 15 jyldam astam ýaqyt boıy qazaq qoǵamyna kerek degen salalarda jumys istep kele jatqanyn bilesizder. Onyń ishinde qazaq tili, qazaq ádebıeti, Qazaqstan tarıhy baǵytynda ǵalymdardy qoldap, bastamalaryna demeýshilik jasap júremiz. Sony eskerse kerek, Berik Ábidǵalıuly bizge shyǵyp usynys jasady. Qordyń qamqorlyq keńesiniń tóraǵasy Islambek Saljanov birdep qup kórip, kitaptyń shyǵýyna atsalystyq. Ázirge 1000 dana bolyp shyǵyp jatyr. El talap áketip, jetpeı jatsa, taǵy da kómektesýge daıynbyz», - dedi qordyń ókili.
Jeltoqsan bozdaqtaryna qatysty derektiń bári sol kezde orys tilinde júrgizilgendikten, kitap ta orys tilinde jazylǵan.
Jıynǵa qatysýshylar bul eńbektiń Jeltoqsan taqyrybyn zertteýge bet burǵan mamandarǵa taptyrmas derekkóz bolatynyn aıtty. Kitaptyń ishindegi QR-kod arqyly osy taqyryptaǵy «Allajar» fılmin de kórýge bolady.
